Пра Радзіму і не толькі

Чытач пра сустрэчу Талентавітыя людзі Астравецкага краю пазнаёмілі са сваёй творчасцю варонскіх школьнікаў.

У госці да дзяцей завіталі ўдзельнікі літаратурнага аб’яднання «Астравецкай зямлі галасы», а таксама мастачка Тарэса Варановіч – і прысвяцілі гэту сустрэчу Году малой радзімы.

Спачатку школьнікі пазнаёміліся з выставай карцін Тарэсы Варановіч. Цікава было паслухаць пра бацькоў мастачкі, партрэты якіх займалі пачэснае месца сярод яе работ. Таксама Тарэса Іосіфаўна расказала пра гісторыю з’яўлення карцін і тое, як яна над імі працуе, якія тэхнікі малявання ёй больш падабаюцца.

Літаратурная частка сустрэчы пачалася з «вітальных» вершаў, якія падрыхтавалі вучні. Знаёмства з паэтамі Астравеччыны адкрыў Аляксандр Марозаў. Ён расказаў пра сваю літаратурную дзейнасць і малую радзіму, якая знаходзіцца ва Украіне, прачытаў некалькі вершаў для дзяцей, а таксама пра вёску Філіпаны, дзе жыве зараз.

З задавальненнем вучні слухалі вершы Таісы Сямёнавай. Святлана Бацюлева захапіла ўвагу слухачоў успамінамі дзяцінства пра падрыхтоўку да навагодніх святаў у вершы «Рэтра-ёлка».

Не трэба было прадстаўляць дзецям Марыю Пешку, якая жыве ў Вароне, а некалі працавала ў мясцовай школе, і Людмілу Кухарэвіч, якая зараз выкладае тут маляванне ў гуртку «Чароўны аловак». Але на гэты раз яны выступалі ў іншай ролі – чыталі свае вершы.

Школьнікі не толькі слухалі сваіх гасцей, але і задавалі ім пытанні. Іх цікавіла, аб чым марылі аўтары, кім хацелі быць, калі напісалі свой першы верш, колькі кніг ужо выдадзена і над чым аўтары працуюць цяпер.

Хочацца спадзявацца, што сустрэча з паэтамі заахвоціць дзяцей больш чытаць, а некаторых, магчыма, натхніць на тое, каб запісаць свае думкі і пачуцці ў вершах.