Калядоўшчыкі ў цэнтры

Ад Ражаства Хрыстовага да Хрышчэння доўжацца Святкі – пара радасці і весялосці. У гэтыя дні спрадвеку было заведзена наведвацца ў кожны дом і віншаваць гаспадароў са святам Хрыстовага Нараджэння, жадаць шчасця і здароўя, прымнажэння дабрабыту і прыбытку ў хаце.

А цяпер калядоўшчыкі ўзялі за моду наведвацца і ў офісы арганізацый. Гэтую добрую традыцыю падтрымліваюць у Тэрытарыяльным цэнтры сацыяльнага абслугоўвання насельніцтва.

Нядаўна сюды завіталі калядоўшчыкі – вакальная група «Аксаміткі» на чале з Васілём Карпяцом. Ніводнага кабінета не абмінулі, усіх супрацоўнікаў павіталі.

Дзед Мароз, Каляда і іх спадарожнікі, казачныя персанажы, весялілі жартамі ды песнямі, разыгрывалі забаўную бяспройгрышную латарэю. У адказ гаспадары кабінетаў не скупіліся на салодкія пачастункі. І быў агульны, на ўсіх, падарунак – цудоўны настрой.