Для ўсіх – на роўных ўмовах
Міністр адукацыі ігар Карпенка і кіраўнік прадстаўніцтва Сусветнага банка ў Беларусі Аляксандр Крэмер падпісалі пагадненне аб дадатковым фінансаванні праекта «Мадэрнізацыя сістэмы адукацыі Беларусі».
Пагадненне прадугледжвае выдзяленне 90 млн еўра для прадаўжэння мадэрнізацыі школ у вёсках і малых гарадах.
У прыватнасці, звыш 81 млн еўра будзе накіравана на рэканструкцыю і капітальны рамонт устаноў агульнай сярэдняй адукацыі, аснашчэнне вучэбна-лабараторным абсталяваннем. У сельскіх школах Віцебскай вобласці (па адной у кожным раёне) створаць цэнтры па аказанні сацыяльнакультурных, псіхалагічных кансультатыўных паслуг. У Магілёўскай вобласці таксама выберуць па адной школе ў кожным раёне, дзе арганізуюць цэнтры інавацыйнага навучання на базе кабінетаў фізікі, хіміі, інфарматыкі, біялогіі. Усяго плануецца адрамантаваць і аплаціць абсталяванне не менш як 220 школам па ўсёй краіне.
Яшчэ 6,7 млн еўра накіруюць на мадэрнізацыю сістэмы кіравання адукацыяй, у тым ліку на ўмацаванне нацыянальнай сістэмы ацэнкі якасці адукацыі і падтрымку мерапрыемстваў па ўдзеле Беларусі ў праграмах PISA ў 2021 годзе. Дарэчы, у 2018 годзе краіна ўпершыню прыняла ўдзел у тэсціраванні PISA, у якім удзельнічалі звыш 5,8 тыс. 15-гадовых школьнікаў.
Каля 2 млн еўра пойдуць на падтрымку рэалізацыі, маніторынгу і ацэнкі праекта.