Да нас прыляцеў «Крыштальны журавель»!
Пераможцы рэспубліканскага конкурсу «Настаўнік года», удзельнікі клуба «Крыштальны журавель» пад кіраўніцтвам начальніка цэнтра развіваючых педагагічных тэхналогій Акадэміі паслядыпломнай адукацыі івана Фёдарава завіталі на Астравеччыну, каб правесці ўрокі і майстар-класы для настаўнікаў школ і педагогаў дашкольнага выхавання. Сустракалі гасцей у гімназіі №1 і дзіцячым садзе №3 нашага горада.
Падобныя выезды ў раёны члены клуба «Крыштальны журавель» арганізоўваюць некалькі разоў на год. Для настаўнікаў і выхавальнікаў гэтыя сустрэчы становяцца своеасаблівым міні-конкурсам «Настаўнік года» і магчымасцю пераняць вопыт калег.
«Крыштальнаму жураўлю» – 12 гадоў. За гэты час многія з яго членаў сталі кіраўнікамі – дырэктарамі школ, начальнікамі аддзелаў адукацыі і іншых устаноў. І гэта – своеасаблівы гонар клуба. – Мы больш чым 50 разоў выязджалі ў розныя рэгіёны краіны. І бачым эфектыўнасць нашай работы, – расказвае Іван Фёдараў. – Астраўцу сёлета пашанцавала. Мы прыехалі сюды напярэдадні старта першага этапа конкурсу «Настаўнік года» – і, думаю, гэта залог будучых перамог вашых настаўнікаў на рэспубліканскім узроўні.
У дзень педагагічнай сустрэчы ў гімназію №1 і дзіцячы сад №3 з’ехаліся настаўнікі і выхавальнікі з устаноў раёна. Цікавыя самапрэзентацыі, урокі матэматыкі, рускай літаратуры, біялогіі, англійскай мовы, фізікі, гісторыі, беларускай мовы і хіміі, заняткі з дашкольнікамі і малодшымі школьнікамі, майстар-классы на розныя тэмы – настаўнікі-канкурсанты дзяліліся сваімі напрацоўкамі, а астравецкія педагогі спасцігалі новыя методыкі выкладання.
– З задавальненнем папрысутнічала на ўроках і майстар-класах пераможцаў рэспубліканскага конкурсу. Члены клуба з’яўляюцца прыкладам прафесійнага майстэрства, і мая даўняя мара – сустрэцца з гэтымі таленавітымі людзьмі – ажыццявілася, – падзялілася ўражаннямі настаўніца гімназіі №1 Вольга Саковіч.
– Уражанні самыя найлепшыя, – гаворыць дырэктар Гудагайскай сярэдняй школы Уладзімір Крывец. – Тым больш што сёння я трапіў на майстар-клас настаўніцы, якая некалі выкладала мне фізіку, і ў многім дзякуючы ёй я выбраў педагагічную спецыяльнасць. Увогуле было цікава пазнаёміцца з лепшымі настаўнікамі рэспублікі, паглядзець, як яны выкладаюць свае прадметы. Ёсць над чым задумацца, узяць штосьці ў сваю педагагічную скарбонку і потым выкарыстаць на практыцы.
…Цікава, захапляльна, творча – гэтымі характарыстыкамі суправаджаліся ўрокі і майстар-класы, якія давалі лепшыя педагогі краіны.
Больш фота да матэрыялаў і каментарыі ўдзельнікаў мерапрыемстваў – на сайце «АП» ostrovets.by і ў тэлеперадачы «ТВА. ТВой Астравец»