З кветкамі, песнямі і салдацкай кашай
Адзначылі Дзень Перамогі астраўчане
Пасля ўрачыстага мітынгу святкаванне плаўна перайшло ў традыцыйнае месца яго правядзення – лесапаркавую зону і перарасло ў прыгожае, запамінальнае і яркае дзейства.
У пачатку цэнтральнай алеі гасцей свята сустракала галерэя «Кветкі Перамогі – воінам Бессмяротнага палка», арганізаваная супрацоўнікамі цэнтральнай раённай бібліятэкі пры падтрымцы раённага краязнаўчага музея. Тут былі змешчаны фотаздымкі нашых землякоў – ветэранаў вайны, да партрэтаў якіх дзяўчаты ў стылізаванай форме прымацоўвалі ў знак памяці і ўдзячнасці кветкі яблыні. Многія падыходзілі да партрэтаў учарашніх суседзяў, знаёмых, родзічаў, каб пакланіцца ім за шчасце жыць пад мірным небам.
Дарэчы, у той дзень многія прынеслі на свята партрэты сваіх дзядоў і прадзедаў, якія «гэты дзень набліжалі, як маглі». Да прыкладу, Алена Аліева прыйшла на свята з партрэтамі сваіх прадзеда Івана Кулёміна, які загінуў пад Ленінградам, і дзеда, артылерыста Мікалая Яшына, – пра лёс кожнага з іх можна пісаць кнігу. Алена Уладзіміраўна беражліва захоўвае памяць пра сваіх продкаў – салдат Перамогі, каб затым перадаць яе сваім чацвярым дзецям – каб не парвалася нітачка…
Гэтую памяць захоўваюць кнігі і часопісы – іх можна было пагартаць у чытальнай зале пад адкрытым небам.
Хоць асноўнае дзейства разгортвалася ўсё ж на галоўнай сцэне амфітэатра. Гледачоў, галоўнымі з якіх былі ветэраны Вялікай Айчыннай вайны Юрый Александровіч і Валянціна Ярохіна, а таксама вязні нямецкіх канцэнтрацыйных лагераў, віталі лепшыя творчыя сілы раёна.
Папуры ваенных песень, лірычныя і патрыятычныя кампазіцыі выканалі хоры ветэранаў і «Польскае рэха Астраўца», мужчынскае трыа ў складзе Аляксандра Юргялянца, Юрыя Інаровіча і Яраслава Вянгроўскага, вакальная група ансамбля «Світанак», салісты Злата Мінкілевіч, Аляксандр Комар і іншыя артысты.
А хто стаміўся адпачываць, мог падсілкавацца салдацкай кашай, якую прыгатавалі супрацоўнікі МНС, ці водарнымі шашлыкамі; паўдзельнічаць у акцыях, якія арганізавалі выратавальнікі, ці пацешыцца вырабамі нашых народных майстроў – а можа, і прыдбаць сабе нешта на памяць пра гэтае цудоўнае свята.