Датэрмінова вызваляць
Палата прадстаўнікоў прыняла на пасяджэнні ў першым і другім чытаннях законапраект аб амністыі ў сувязі з 75-годдзем вызвалення Беларусі ад нямецка-фашысцкіх захопнікаў. Законапраект распрацаваны па даручэнні Прэзідэнта. Пра яго асаблівасці расказаў міністр унутраных спраў Юрый Караеў.
«Тэрмін выканання законапраекта павялічаны з 6 да 9 месяцаў. Прапануецца скараціць пакаранне на адзін год не толькі асобам, якія ўчынілі злачынствы, прадугледжаныя ч. 1 арт. 328, але ч.ч. 2 і 3 гэтага артыкула. «У норму закона аб амністыі, якая прадугледжвае скарачэнне тэрміну пакарання, уведзена дадатковая катэгорыя – непаўналетнія. Ім тэрмін пакарання прапануецца скараціць на два гады», – адзначыў міністр.
Юрый Караеў падкрэсліў, што амністыя не будзе распаўсюджвацца на асоб, якія ўчынілі карупцыйныя злачынствы, пералік якіх пазначаны ў Дэкрэце ад 10 мая 2019 года №3.
Як паведамлялася, амністыя будзе прымяняцца толькі да асоб, якія станоўча характарызуюцца і цалкам кампенсавалі ўрон, прычынены злачынствам.
Прапануецца не распаўсюджваць амністыю на тых, хто раней ёю скарыстаўся, але зноў учыніў злачынства. Гэта ж адносіцца і да тых, хто злосна парушае ўстаноўлены парадак адбывання пакарання, асоба небяспечных рэцыдывістаў. Амністыя не будзе распаўсюджвацца на тых, хто ўчыніў пэўныя катэгорыі злачынстваў. Сярод іх злачынствы супраць жыцця і здароўя чалавека, палавой недатыкальнасці, звязаныя з незаконным абаротам наркотыкаў, учыненыя арганізаванай групай, карупцыйныя злачынствы.
Прыняцце закона аб амністыі і яго рэалізацыя не прывядзе да пагаршэння крымінагеннай абстаноўкі. Амністыя прымяняецца, як правіла, да тых, хто ўпершыню асуджаны да пазбаўлення волі за злачынствы, якія не адносяцца да катэгорыі цяжкіх альбо не ўяўляюць вялікай грамадскай небяспекі.