Прытрымлівайцеся правілаў!
Грамадскае абмеркаванне праекта змяненняў ва ўказ аб мерах па павышэнні бяспекі дарожнага руху прайшло ў маі. Цяпер дакумент узгадняецца з дзяржорганамі. Неабходнасць у змяненні заканадаўства з'явілася ў тым ліку з-за развіцця тэхналогій: на дарогах стала больш транспарту, які аднесці да пэўнай катэгорыі ў рамках дзеючага заканадаўства цяжка.
У новай рэдакцыі правіл дарожнага руху ўводзіцца новы тэрмін «сродкі персанальнай мабільнасці». Гэта ўстройствы, якія маюць рухавік. Пры гэтым іх максімальна дапушчальная скорасць будзе складаць 25 км/гадз. Асобы, якія выкарыстоўваюць такія сродкі для перамяшчэння, будуць прыраўноўвацца да пешаходаў.
Калі ўстройства персанальнай мабільнасці, гэта значыць электрасамакат, гіраскутар або монакола, разганяецца больш як 25 км/гадз, не маючы заводскіх або праграмных абмежаванняў скорасці, з ім будзе забаронена ўдзельнічаць у дарожным руху. Катацца з такой скорасцю дазволяць толькі на абмежаваных пляцоўках. «Перамяшчацца на такіх устройствах трэба будзе па веласіпедных дарожках. Пры іх адсутнасці – па тратуарах, абочынах, не ствараючы перашкод для руху іншым пешаходам», – растлумачыў прадстаўнік ДАІ.
Згодна з абноўленымі ПДР будзе забаронена «пры выхадзе на праезную частку і руху па ёй рабіць дзеянні, якія пагражаюць бяспецы дарожнага руху». Гэта азначае, што, перасякаючы дарогу, нельга будзе ісці ў навушніках, у капюшоне, глядзець у тэлефон, паколькі гэта адцягвае ўвагу пешахода.
З'явіцца паняцце «зона з абмежаваннем максімальнай скорасці руху» і адпаведны знак. Гэта зроблена, каб на кожным скрыжаванні не дубліраваць абмежаванне скорасці, не ўстанаўліваць дадатковыя няроўнасці. Ёсць месцы, напрыклад, невялікія вулачкі ў цэнтры горада, з актыўным пешаходным рухам, машыны там таксама перамяшчаюцца. Уезды ў такія зоны будуць адзначаны спецыяльнымі знакамі. Гэта сусветная практыка, многія краіны выкарыстоўваюць такія зоны. Скорасць у іх плануецца абмежаваць да 30 км/гадз.
Дадаткова ў ПДР абазначаць перыяды, калі ў машын павінна быць уключана блізкае святло фар, – з 25 мая па 5 чэрвеня і з 25 жніўня па 5 верасня.
Плануецца таксама, што веласіпедыстам дазволяць не спешвацца на рэгулюемых пешаходных пераходах. Пры гэтым давядзецца запаволіцца да скорасці людзей, якія перасякаюць дарогу. Гэта правіла будзе датычыцца і тых, хто выкарыстоўвае сродкі персанальнай мабільнасці. На пераходах жа без святлафора веласіпедыстам па-ранейшаму давядзецца ісці пяшком.
Паводле матэрыялаў БелТА.