Меркаванні

– Прагаласаваць лічу сваім абавязкам. Спадзяюся, што кандыдат у дэпутаты, за якога паставіла галачку, калі, канешне, яго выберуць і іншыя астраўчане, дапаможа палепшыць умовы нашага жыцця. У прыватнасці, вырашыць шматгадовае пытанне з асфальтаваннем вуліцы Гагарына, на якой я жыву.

Ірына Шышко, выбаршчык.

– Не першы раз з’яўляюся назіральнікам на выбарах – толькі на прэзідэнцкіх была двойчы, не лічачы парламенцкіх. У гэтым годзе на нашым выбарчым участку абстаноўка спакойная. Актыўна галасуе моладзь, што вельмі радуе. Найбольшая колькасць выбаршчыкаў назіралася з раніцы. Акрамя мяне, на ўчастку працуюць назіральнікі ад раённых прафсаюзных пярвічак, Беларускага саюза жанчын, БСРМ і савета ветэранаў. Гражына Петрулевіч,

назіральнік ад РГА «Белая Русь».

– У выбарах мы ўдзельнічаем заўсёды. У сувязі з будаўніцтвам атамнай электрастанцыі ў Астравец пераехала шмат маладых сямей. Думаю, што абраны дэпутат апраўдае давер сваіх выбаршчыкаў і будзе шмат увагі надаваць пытанням адукацыі, медыцыны і маладзёжнай палітыкі.

Наталля Карніла, выбаршчык.

– Я лічу, што гэта грамадзянскі абавязак кожнага чалавека – прыйсці на выбарчы ўчастак і прагаласаваць. Да таго ж, як сакратар пярвічнай арганізацыі ГА БРСМ, хачу сваім прыкладам прадэманстраваць падрастаючаму пакаленню, што моладзь павінна цікавіцца палітычным жыццём краіны і ўдзельнічаць у ім. Будучыню Радзімы ствараць маладым!

Юлія Бруйко, выбаршчык.

– Для мяне дзень выбараў – святочны. Заўсёды галасую ў асноўны дзень. Хочацца, каб абраны сёння дэпутат больш увагі ўдзяляў насельніцтву і яго праблемам і апраўдаў надзеі жыхароў раёна.

Станіслава Козіч, выбаршчык.

– Выбары на нашым участку праходзілі спакойна. У апошні дзень датэрміновага галасавання ў нас былі замежныя назіральнікі з арганізацыі па бяспецы і супрацоўніцтву ў Еўропе. Яны папрасілі дазволу сфатаграфаваць пратаколы і паглядзець, дзе захоўваюцца бюлетэні. Таксама пацікавіліся колькасцю выбаршчыкаў на ўчастку і членаў камісіі, графікам дзяжурства і работай старшыні камісіі.

Надзея Субач, старшыня камісіі.

– Сёння ў нас выхадны – галасуем за сваю будучыню і шчаслівае жыццё нашых дзяцей і ўнукаў. Сям'я Мінкевіч, выбаршчыкі.

– Дэпутату, хто б ён ні быў, хочацца пажадаць аднаго: каб пасля выбараў памятаў, што гаварыў людзям, і выконваў свае абяцанні.

Ігар Тарыма, выбаршчык.