Адказная перавозка
Перафразуючы вядомы выраз, скажу: вадзіцелі ў адказе за тых, каго перавозяць у аўтамабілі, асабліва – маленькіх пасажыраў. Пра гэта гавораць і правілы дарожнага руху, адзін з пунктаў якіх патрабуе перавозіць дзяцей да 12 гадоў у спецыяльных прыстасаваннях. Як выконваюць гэту ўмову астраўчане, высвятляў журналіст «АП», адправіўшыся ў рэйд з супрацоўнікам дарожна-паставой службы аддзялення ДАІ.
Рэйд праводзілі падчас прафілактычнай акцыі «Захавай дзіцяці будучыню», накіраванай на папярэджанне дарожнатранспартных здарэнняў з удзелам непаўналетніх. А восьмай гадзіне разам са старшым інспектарам ДПС Уладзімірам Васілевічам мы адправіліся патруляваць вуліцы Астраўца.
– Ранак – найлепшы час, каб праверыць, як перавозяць дзяцей, бо многія бацькі падвозяць іх у школу і дзіцячыя садкі, – тлумачыць Уладзімір Васілевіч.
Пунктам назірання стала пляцоўка каля фізкультурна-аздараўленчага комплексу – і невыпадкова. Тут непадалёк знаходзяцца два дзіцячыя садкі – №3 і №4. Чакаць доўга не давялося: хутка ў гэты бок шнурком пацягнуліся аўтамабілі, з вокнаў якіх цікаўна выглядвалі дашкаляты. Яны сядзелі ў спецыяльных прыстасаваннях, прышпіленыя рамнямі бяспекі.
– Гэта некалькі гадоў назад, калі толькі пачынаўся бум з адпаведнымі патрабаваннямі
ПАМЯТАЙЦЕ, што ў аўтамабілі:
да перавозкі дзяцей, можна было за дзяжурства выявіць шмат парушэнняў, – расказвае старшы інспектар ДПС. – Пасля людзі паступова ўсвядомілі, што гэта мера накіравана перш за ўсё на бяспеку малышоў, таму цяпер адносяцца да перавозкі дзяцей сур’ёзна і выконваюць патрабаванні.
У пацвярджэнне сказанага – падчас рэйду не было выяўлена няправільнай перавозкі дзяцей. Аднак гэтыя вынікі не гавораць пра адсутнасць праблемы. Асноўныя прычыны: вадзіцелі сядалі ў іншую машыну і забывалі ці не паспявалі перанесці ўтрымліваючае прыстасаванне для дзяцей. На жаль, часам такая забыўчывасць можа каштаваць вельмі дорага…