«Зебра» бяспекі

вадзіцелі ў 2019 годзе ў раёне за парушэнне правілаў дарожнага руху на нерэгулюемых пешаходных пераходах былі прыцягнуты да адміністрацыйнай адказнасці (у 2018-м – 132).

ПАЧАТАК ТЭМЫ на 1-й старонцы

Першым назіральным пунктам стала «зебра» каля магазіна «Кулінарыя». Людзей і машын тут няшмат. Пешаходамі былі ў асноўным маладыя жанчыны з каляскамі, школьнікі і людзі сталага ўзросту. Яны пераходзілі дарогу акуратна і ўважліва. І толькі адзін падлетак самаўпэўнена ступіў на праезджую частку, нават не падняўшы вачэй ад мабільніка.

– На жаль, нямала людзей, якія лічаць, што на пешаходным пераходзе закон заўсёды на іх баку, – пракаменціраваў сітуацыю інспектар дарожна-паставой службы ДАІ Сяргей Шлыковіч. – Сапраўды, на «зебры» ў пешахода перавага, аднак не варта забываць і пра прапісаныя ў правілах дарожнага руху абавязкі. Перад тым як ступіць на праезджую частку нават на пешаходным пераходзе, чалавек павінен упэўніцца, што выхад на дарогу бяспечны. Аднак пра гэта пешаходы чамусьці забываюць. Больш таго, некаторыя з іх ідуць па «зебры» ў нацягнутым па самыя вочы капюшоне, у навушніках ці не адрываючы погляд ад гаджэтаў. А вадзіцелі не богі – на дарозе ўсялякае можа здарыцца. Яшчэ пешаходы не павінны забываць пра святлоадбівальныя элементы ў цёмны час сутак – любы вадзіцель пацвердзіць, што яны дапамагаюць здалёк убачыць чалавека на дарозе.

Праз паўгадзіны дзяжурства мы змянілі месца дыслакацыі, выбраўшы скрыжаванне каля магазіна «Вернісаж», дзе ў полі зроку аказаліся адразу тры пешаходныя пераходы. Інтэнсіўнасць руху тут нашмат вышэйшая, магчыма, яшчэ і таму, што наступіў абедзенны час. Тым не менш, аўтамабілі загадзя зніжалі хуткасць перад «зебрай», а пешаходы акуратна і хутка пераходзілі дарогу.

– Канешне, сярод вадзіцеляў таксама хапае парушальнікаў, – адзначыў інспектар ДПС. – Ёсць ліхачы, якіх нават штучныя няроўнасці перад перашаходным пераходам не спыняюць. З такімі размова кароткая: не разумееце патрабаванняў – заплаціце штраф.

Дарэчы, вадзіцель, які не прапусціў пешахода на «зебры», на першы раз можа атрымаць папярэджанне, у астатніх жа выпадках заплаціць штраф ад 1 да 5 базавых велічынь. Калі ж вадзіцель створыць аварыйную сітуацыю для пешахода – пакаранне вырасце ад 5 да 20 базавых з магчымым пазбаўленнем вадзіцельскіх правоў на два гады.

За гадзіну з лішкам, што доўжыўся рэйд, мы не заўважылі сур’ёзных парушэнняў. Хочацца спадзявацца, што вадзіцелі і пешаходы будуць узаемна ветлівымі, не толькі ўбачыўшы супрацоўніка ДАІ, але заўсёды. Дарога адна і жыццё адно – навошта ім рызыкаваць, высвятляючы, хто галоўны?!

ЗАКОН ДЛЯ ВСЕХ