Індывідуальны падыход
Міністр эканомікі заявіў, што кожны раён Беларусі павінен мець сваю праграму развіцця на аснове канкурэнтных пераваг.
«Сёння кожны раён мае сваю спецыялізацыю, вытворчы, прыродны, сыравінны, працоўны патэнцыял, кампетэнцыі. Усё гэта ў сукупнасці з'яўляецца канкурэнтнымі перавагамі. Наша задача – выкарыстоўваць гэтыя перавагі як лакаматыў росту, каб на іх аснове сфарміраваць бізнесмадэлі развіцця тэрыторый. Кожны раён павінен мець свой твар, бізнес-мадэль, праграму развіцця на аснове канкурэнтных пераваг, якія нам трэба вызначыць зыходзячы са спецыялізацыі, патэнцыялу і кампетэнцый», – такое меркаванне выказаў міністр.
Такія праграмы плануецца распрацаваць да канца года. У стратэгію на наступную пяцігодку будзе закладзены індывідуальны падыход да развіцця рэгіёнаў.
У якасці прыкладу міністр узяў Браслаўскі і Мядзельскі раёны. «Прырода стварыла там асяроддзе, цікавае для турыстаў,
для адпачывальнікаў. Гэтыя канкурэнтныя перавагі мы павінны выкарыстоўваць максімальна. На сферу паслуг, турызм у гэтых раёнах павінны працаваць усе астатнія галіны. Транспарт павінен забяспечыць мабільнасць, камфортнае і бяспечнае асяроддзе перамяшчэння, будаўніцтва – адпаведную інфраструктуру, сельская гаспадарка – вытворчасць экалагічна чыстых прадуктаў, развіццё фермерства», – адзначыў ён.
«Глабальныя працэсы, звязаныя з урбанізацыяй, негатыўна ўплываюць на раўнамернасць развіцця нашых рэгіёнаў. Насельніцтва і большасць рэсурсаў канцэнтруецца ў гарадах. Такая сітуацыя фарміруе пэўныя эканамічныя, дэмаграфічныя і сацыяльныя рызыкі. Асноўная мэта – вызначыць меры, якія змогуць знівеліраваць гэтыя рызыкі», – рэзюмаваў міністр.