Пра герояў былых часоў
Распавядалі наведвальнікі Тэрытарыяльнага цэнтра сацыяльнага абслугоўвання насельніцтва, сабраўшыся на дзень мастацкага чытання пад такой назвай.
А паколькі ўсе яны людзі старэйшага пакалення, то і ўспаміналі найбольш пра былых франтавікоў. Ды і сама імпрэза прысвячалася Дню Перамогі і 80годдзю вызвалення нашай краіны ад фашысцкай навалы.
Адкрыла яе і душэўна правяла супрацоўнік цэнтра Яўгенія Шаптун. А распачала самая маладая ўдзельніца мерапрыемства – супрацоўнік філіяла цэнтра ў вёсцы Падольцы Дзіяна Аляксандрава. Яна прачытала свае цудоўныя кранальныя вершы, філасофскія і лірычныя.
У лёсах Наталлі Пятроўны Зубенкі і Марыі Паўлаўны Леановіч вайна пакінула найбольш глыбокія адзнакі – іх дзяцінства прыйшлося на страшнае ліхалецце. Першая прачытала свае вершы, а другая падзялілася ўспамінамі. Святлана Іванаўна Мешкіс, шчырая прыхільніца творчасці паэтафрантавіка Аляксандра Твардоўскага, прачытала ўрывак «Пераправа» з яго паэмы «Васілій Цёркін». Неўпрыкмет паэтычнае свята пашырыла тэматыку. Алена Аляксандраўна Качан, Людміла Іванаўна Ярмольчык прадэкламавалі вершы пра сучасных герояў: урачоў, медсясцёр; Ірына Аляксандраўна Станкевіч – лірычны твор папулярнага савецкага паэта Эдуарда Асадава. А Тамара Сцяпанаўна Петрусевіч, вялікі знаўца беларускай паэтычнай класікі, прапанавала слухачам нізку вершаў Вінцэнта Дунінамарцінкевіча, Янкі Купалы і Якуба Коласа, Максіма Багдановіча, Ніла Гілевіча.
Такім чынам, дзень мастацкага чытання стаў сапраўдным святам рознажанравай паэзіі і прайшоў, як кажуць, на адным дыханні.
Таіса СЯМЁНАВА.