З надзеяй на новыя сустрэчы

Вясеннія сустрэчы аматараў музыкі з выкладчыкамі дзіцячай школы мастацтваў сталі ўжо традыцыйнымі – яны карыстаюцца нязменнай папулярнасцю ў астраўчан. Вядучая канцэрта Аксана Сяўко падрыхтавалася да сустрэчы з паклоннікамі інструментальнай і вакальнай музыкі як след: кожнай кампазіцыі папярэднічалі звесткі пра гісторыю яе стварэння і цікавыя факты з жыцця выканаўцаў.

Якіх толькі куміраў мінулага стагоддзя ні пераспявалі і ні перайгралі астравецкія педагогі музыкі! Гучалі песні і інструментальныя кампазіцыі з рэпертуару Аркадзя Укупніка і Дзмітрыя Малікава, Веранікі Долінай і Піліпа Кіркорава, Наташы Каралёвай і Валянціны Легкаступавай, Рады Рай і Ганны Герман.

Кожны з выкладчыкаў Астравецкай школы мастацтваў і яе сельскіх філіялаў змог прадэманстраваць свае таленты – сольна і ў складзе калектываў. Доўга не сціхалі апладысменты пасля выступлення народнага ансамбля народных інструментаў «Скарбніца» пад кіраўніцтвам нязменнай і нястомнай Надзеі Шарэйкі. Авацыямі суправаджалася шоў цымбалістак Алены Капыловай і Вольгі Грагоўскай. Кожны выхад на сцэну вакальнага трыа «Кансананс» – сустрэча з прыгажосцю, грацыяй, талентам, а «Дудкішоў» у чарговы раз прадэманстравалі агністую сумесь музыкі і харызмы выканаўцаў. Песню «Надзея» разам з Данутай Блашкевіч спявала ўся зала.

Падобныя канцэрты выкладчыкаў школы мастацтваў – гэта заўсёды пазнавальна, цікава, прыгожа, са знакам якасці. А калі нейкія нумары не дацягвалі да найвышэйшай адзнакі, то ўлюбёныя ў сваіх куміраў гледачы зрабілі выгляд, што не заўважылі невялікіх хібаў: іх апладысменты былі такімі ж шчырымі і гарачымі, як і заўсёды.

Гэтаксама, як і надзеі на новыя сустрэчы!

Ніна РЫБІК, фота аўтара.