Спасцігнуць Караткевіча

Наталля КУНЦЭВІЧ

26 лістапада краіна адзначыла 90-годдзе славутага беларускага пісьменніка Уладзіміра Караткевіча.

Калі вы чуеце гэта імя, які яго твор найперш узгадваецца? “Чорны замак Альшанскі”, а можа, “Каласы пад сярпом тваім”? Згадзіцеся, што кожная аповесць, раман, апавяданне гэтага таленавітага пісьменніка з’яўляецца сапраўдным скарбам беларускай літаратуры. З нагоды юбілея аўтара аматараў яго творчасці сабрала Гродзенская абласная навуковая бібліятэка імя Яўхіма Карскага. Да мерапрыемства далучыліся і моладзь, і людзі больш сталага ўзросту. Сярод гасцей быў і начальнік галоўнага ўпраўлення адукацыі Гродзенскага аблвыканкама Руслан Абрамчык, які таксама з’яўляецца аматарам твораў нашага таленавітага земляка.

– Што мне падабаецца? Найперш “Каласы пад сярпом тваім”, “Лісце каштанаў”. Менавіта гэтыя творы склалі маё першае і асноўнае ўражанне аб Уладзіміру Караткевічу. Не магу не ўспомніць “Чорны замак Альшанскі” і “Дзікае паляванне караля Стаха” – іх можна чытаць у дзяцінстве, але гэта тыя творы, да якіх трэба вяртацца і ў дарослым узросце, – адзначыў Руслан Абрамчык. – Творы Караткевіча фарміруюць светапогляд чалавека. Яны адкрываюць вочы на беларускую

нацыю як на народ са сваёй гісторыяй, сваімі яскравымі падзеямі, героямі мінулага.

Да святочнай даты ў абанементным аддзеле абласной бібліятэкі арганізавалі тэматычны літаратурны прагляд “Свет шчодры. Свет мяне паўторыць…”. На паліцах сабраны кнігі з інфармацыяй аб жыцці і творчай спадчыне Уладзіміра Караткевіча. А напярэдадні юбілея класіка беларускай прозы абласная бібліятэка запусціла ў анлайн-рэжыме акцыю “Чытаем разам творы Караткевіча”, да яе мог далучыцца любы жыхар Гродзеншчыны.

– Мы прапанавалі чытачам,

Фота Юрыя Дубовіка.

якія пражываюць у розных населенных пунктах Гродзенскай вобласці, далучыцца да акцыі і зняць невялікае відэа, на якім яны чытаюць свой любімы ўрывак з рамана, апавядання, аповесці ці верша Уладзіміра Сямёнавіча, – расказвае намеснік дырэктара Гродзенскай абласной навуковай бібліятэкі імя Я. Ф. Карскага Марыя Ігнатовіч. – Потым трэба было даслаць гэта відэа на адрас нашай установы, а мы ўжо адабралі лепшае, скампанавалі і апублікавалі на сваім сайце.

Прачытаць тэксты славутага пісьменніка пажадалі больш за 30 чалавек. Сярод лідэраў аказаўся верш Караткевіча “Бацькаўшчына”. Дарэчы, па словах спецыялістаў абласной бібліятэкі, творы беларускіх аўтараў карыстаюцца попытам у гродзенскіх чытачоў. Сярод найбольш любімых – кнігі Івана Мележа і, канешне, Уладзіміра Караткевіча. Па творах апошняга можна вывучаць гісторыю, бо менавіта гэта тэматыка праходзіць праз амаль усе яго творы.

– Маладому беларусу важна чытаць і адчуваць Караткевіча, бачыць гісторыю праз яго успрыманне. Бо якраз у яго творах ёсць любоў, павага, прага да спасціжэння чагосьці новага і самае галоўнае – бязмежная любоў да Беларусі, да Бацькаўшчыны, – адзначыў дырэктар навуковай бібліятэкі ГРДУ імя Янкі Купалы Мікалай Грынько.

Народны паэт Беларусі Рыгор Барадулін казаў: “Кожная літаратура можа называцца багатай і сталай, калі мае свайго Караткевіча”. Нам як нікому пашчасціла: мы маем яго. Таму, калі ў вас раптам з’явілася жаданне ўзяць у рукі кнігу Караткевіча – не адказвайце сабе ў гэтай асалодзе чытання. Магчыма, у знаёмым вам раней творы таленавітага пісьменніка зможаце знайсці адказы на хвалюючыя пытанні.