Моцная сям’я — будучае Беларусі
У гэты дзень раённы Дом культуры поўніўся музыкай, апладысментамі і адчуваннем сапраўднага свята — гасцінная верхнядзвінская зямля сустракала ўдзельнікаў абласнога этапа рэспубліканскага сямейнага сельскагаспадарчага праекта «Уладар сяла-2015».
Зарадзіўся праект у 2007 годзе ў Глыбокім, атрымаў падтрымку на рэспубліканскім узроўні і аб’яднаў за гэтыя гады больш за 7 тысяч маладых сем’яў з беларускай глыбінкі.
Вітаючы гасцей, першы намеснік старшыні райвыканкама, начальнік упраўлення сельскай гаспадаркі і харчавання У.Быкаў адзначыў, што колькасць прыехаўшых на свята сем’яў сведчыць аб багацці беларускай зямлі і захаванні традыцый нашых продкаў.
Пераможца абласнога этапа прыме ўдзел у рэспубліканскім, які пройдзе ў кастрычніку ў Гродзенскай вобласці. Аб гэтым нагадаў Д.Туронак, другі сакратар Віцебскага абласнога камітэта грамадскага аб’яднання «Беларускі рэспубліканскі саюз моладзі».
У фае Дома культуры размясціліся выставы вырабаў мясцовых майстроў, фотавыстава, госці мелі магчымасць паўдзельнічаць у майстар-класах па выцінанцы, габелену, пляценні з саломкі.
Тэма свята — «Вёска: традыцыі і сучаснасць»— была адлюстравана і ў выставах, і ў конкурсах.
Выпрабаванні пачаліся з візітнай карткі «Вітаем пабеларуску» — кожная сям’я падчас невялікай тэатралізаванай замалёўкі расказвала аб адным з дзён сям’і, сваіх захапленнях, дасягненнях і традыцыях, адпачынку. Гучалі вершы, песні, прыпеўкі, аповеды з выкарыстаннем відэаматэрыялаў.