КАМБАЙНЫ ВЫЙШЛІ Ў ПОЛЕ
Аднымi з першых у Аршанскім раёне прыступілі да ўборкі ўраджаю ў філіяле «Цяплічны» РВП «Віцебскэнерга». У поле выйшлі чатыры экіпажы камбайнераў. Пяць адзінак тэхнікі задзейнічаны на адвозцы зерня. У гэтыя дні ідзе напружаная праца на палетках каля вёскі
— Пачаліся залатыя дзянёчкі, — гаворыць дырэктар Павел Фаміноў. — Хлеб паспеў добры, і наша агульная справа — своечасова яго ўбраць. Праўда, сёлета прырода крыху ўнесла карэктывы. Пасля стыхіі палегла 15—20 працэнтаў хлеба. Камбайнерам даводзіцца праяўляць усё сваё майстэрства, каб страты зерня былі мінімальныя.
Усяго ў сельскагаспадарчым прадпрыемстве «Цяплічны» неабходна ўбраць 338 гектараў азімай пшаніцы, 244 — ячменю, 134 — зернебабовых культур. Плануецца, што і ўраджайнасць будзе не горшая за мінулагоднюю — не менш за 40 центнераў з гектара.
Як толькі тэхніка выйшла ў поле, у філіяле «Цяплічны» разгарнулася спаборніцтва сярод экіпажаў камбайнераў, па выніках якога пераможцы будуць узнагароджаны каштоўнымі падарункамі. Таксама трэці год запар кіраўніцтва сельскагаспадарчага прадпры- емства адзначае грашовай прэміяй лепшае звяно за выкананне планавых паказчыкаў.
Уладзімір Сінкевіч і Генадзь Маісеенка, Андрэй Максак і Мікіта Гінтаўт, Аляксандр Гаравец і Аляксандр Трынчыкаў, а таксама сын і бацька — Алег і Сцяпан Снытко — уступілі ў барацьбу за ўраджай-2016. Амаль што ўсе хлебаробы — прафесіяналы сваёй справы, за плячыма не адна ўборачная кампанія, але ёсць і дэбютанты, як, напрыклад, Мікіта Гінтаўт. Для Сцяпана Снытко таксама гэта жніво стане сур’ёзным выпрабаваннем на шляху да будучай прафесіі, добрай вытворчай практыкай. Малады хлопец — будучы аграном — вучыцца ў Смальянскім аграрным каледжы, а пасля заканчэння прыйдзе працаваць у «Цяплічны».
Як сцвярджае намеснік дырэктара па раслінаводстве Віктар Дубянец, у хлебаробскай справе важна не толькі хуткасць. На першы план усё ж такі выходзіць якасць работы. І кожны экіпаж камбайнераў гэта добра разумее.
Для высокай арганізацыі работы на жніве ў філіяле «Цяплічны» РВП «Віцебскэнерга» створаны ўсе неабходныя ўмовы. Вялікая ўвага нададзена пытанням аховы працы, пажарнай бяспекі, харчавання.
Надзеі на сёлетняе жніво ў аграрыяў вялікія. Яны прыкладуць усе намаганні, каб своечасова ўбраць хлеб з палёў.
На здымку: дырэктар філіяла «Цяплічны» П. Фаміноў, хлебаробы А.Максак, А. і С.Снытко, М.Гінтаўт, намеснік па раслінаводстве В.Дубянец.