Нам засталася спадчына
Напрыканцы зімы ў дзіцячым садку №101 адбыўся фестываль беларускіх гульняў. У ім прынялі ўдзел выхаванцы сярэдніх і старэйшых груп. Арганізатары імкнуліся стварыць добры, радасны настрой, спрыяць наладжванню добразычлівых адносін паміж малымі, развіваць здольнасць суперажываць партнёру па гульні. А разам з тым спакваля выклікаць цікавасць да народных традыцый, выхоўваць любоў да сваёй краіны.
Пра пачатак свята дзятве абвясцілі гарэзлівыя скамарохі. Яны і запрасілі адправіцца да першай станцыі пад назвай «Карагодная». Але кожная з груп павінна была рухацца па сваёй «чароўнай сцежцы», на якой удзельнікаў чакалі розныя вясёлыя выпрабаванні. Трапіўшы на станцыю, дзеткі адгадвалі загадкі, вадзілі карагоды, гулялі ў «Круг — кола».
Наступнай была станцыя «Беларуская хата», на якой гасцей сустрэла ветлівая бабуля. Яна прывітала іх словамі з верша вядомай паэткі Дануты БічэльЗагнетавай: «Тата, мама і браты, сястра, бабуля, дзед і шмат радні зрабілі ўсё, каб меў радзіму ты. Яе высокі гонар барані!»
Потым бабуля нагадала дзеткам любімыя стравы беларусаў — клёцкі, зацірка, дранікі і іншыя. Здаўна на Беларусі гатавалі і смачныя напоі: бярозавы сок, хлебны квас, кісель з журавінаў. Для гэтага гаспадыні карысталіся разнастайным гліняным посудам: збанамі, гаршкамі, міскамі. А яшчэ нашы продкі прыдумалі многа цікавых гульняў, у якіх выкарыстоўваліся прадметы посуду або ежа. Бабуля згуляла з дзеткамі ў «Гарачыя гаршчочкі» і «Бульбу».
На апошняй станцыі, на якую дабраліся дзеці, іх зноў чакалі скамарохі з вясёлымі беларускімі гульнямі. А калі свята падышло да свайго завяршэння, дзецям прапанавалі смачныя гасцінцы. Частуйцеся, калі ласка! Не хварэйце, любіце радзіму, цікаўцеся яе мінулым. Вам давядзецца клапаціцца пра яе будучыню.