У гонар Песняра
Сёлетні год праходзіць пад знакам 135-годдзя народнага паэта Беларусі Якуба Коласа. Адно з апошніх мерапрыемстваў у гонар славутага земляка прайшло ў віцебскім КДЦ «Першамайскі», дзе, дарэчы, ёсць бібліятэка, якая носіць імя творцы.
Прысутным (вучням і іх настаўнікам, работнікам гарадской бібліятэчнай сістэмы, месцічам, якія цікавяцца літаратурай) нагадалі штрыхі жыццяпіса дзядзькі Якуба, яго творы. Пакладзены на музыку ўрывак аднаго з іх — «Мой родны кут» — стаў своеасаблівай візітоўкай нашага краю.
З бібліятэкай імя Якуба Коласа актыўна супрацоўнічае старшыня абласнога аддзялення Саюза пісьменнікаў Беларусі Тамара Краснова-Гусачэнка, якая вядзе тут гурток «Планета дзяцінства». Тамара Іванаўна пад апладысменты ўдзячных слухачоў прачытала нізку сваіх вершаў і паразважала пра тутэйшы білінгвізм, які толькі спрыяе ўзбагачэнню нашых моў.
Кіраўнік цэнтралізаванай бібліятэчнай сістэмы Віцебска Галіна Данілава сказала колькі шчырых слоў пра асобу Якуба Коласа — аднаго з сімвалаў Беларусі, якi ведаюць ва ўсім свеце, а таксама ўручыла сувенір з выявай песняра загадчыцы бібліятэкі яго імя Таццяне Чарнушынай.