Высокая місія — класны кіраўнік
Класны кіраўнік — верны сябар альбо патрабавальны педагог, клапатлівы заступнік цi строгі крытык? На гэтыя пытанні шукалі адказ 12 педагогаў Докшыцкага раёна падчас раённага конкурсу прафесійнага майстэрства «Лепшы класны кіраўнік».
Журы загадзя ацаніла вопыт работы канкурсантаў, іх уменне весці дакументацыю, відэазапісы класных гадзін. Удзельнікам засталося прадэманстраваць візітную картку «Наш самы лепшы класны!».
Выступленні былі яркімі і запамінальнымі. Напрыклад, Валянціна Арцімёнак з СШ № 1 запрасіла прысутных на шоу «Лепш за ўсіх». Варта адзначыць, што адразу тры пакаленні выхаванцаў Валянціны Іванаўны прыйшлі падтрымаць сваю першую настаўніцу. Сведчанняў таму, што класнаму кіраўніку 9-га класа, настаўніцы рускай мовы і літаратуры Бягомльскай СШ Але Скок пашчасціла са сваімі выхаванцамі, вельмі многа. Адзін толькі пераможны ролік-віншаванне з Днём настаўніка чаго каштуе! Ён стаў сапраўдным сюрпрызам для педагога, як і запрашэнне на праграму «Вячэрні Віцебск» ТРК «Віцебск». Падчас выступлення настаўніцы фізікі і інфарматыкі Сітцаўскай СШ Жанны Норавіч са сцэны гучала беларуская мова, а конкурсны нумар яе калегі Святланы Пяцько з Параф’янаўскай СШ вылучаўся незвычайным сюжэтам: яе вучні павінны былі прайсці выпрабаванні, каб адшукаць свайго класнага кіраўніка. Адзіны мужчына, настаўнік геаграфіі і біялогіі Тумілавіцкай ДС-СШ Дзмітрый Паўлючэнка, разам са сваім выпускным класам паказаў цікавае, насычанае рознымі элементамі шоу і запаліў залу энергічным танцам. Настаўніца англійскай мовы Крулеўшчынскай СШ Іна Косціна расказала, як няпроста быць класным кіраўніком у хлапечым калектыве. Завяршалі конкурсную праграму візітоўкі настаўніцы гісторыі і грамадазнаўства Парплішчанскай СШ Наталлі Крук і настаўніцы пачатковых класаў СШ № 2 Докшыц Алесі Вайцяховіч, чые выступленні былі аб’яднаны тэматыкай марскога падарожжа.
Удзельнікі былі адзначаны дыпломамі ў розных намінацыях, а лепшым класным кіраўніком стала настаўніца СШ № 2 Алеся Вайцяховіч. Алеся Вайцяховіч разам з выхаванцамі вядзе свой «карабель» да перамогі. Ответственная за выпуск Наталья ЧЕРНИЧЕНКО (тел. 67-33-45).