Аддаваць так лёгка
На днях у Сенненскай школе-інтэрнаце для дзяцей-сірот і дзяцей, якія засталіся без апекі бацькоў, пабываў старшыня Віцебскага абласнога Савета дэпутатаў Уладзімір Цярэнцьеў.
Уладзімір Уладзіміравіч уручыў дырэктару ўстановы Леаніду Казлову сертыфікат, які дазваляе школе набыць мэблю і бытавую тэхніку.
Адначасова школу ў той дзень наведала памочнік дырэктара ААТ «ПрыватЛізінг» Вольга Радзецкая. І таксама з падарункамі. На працягу двух апошніх гадоў гэта таварыства «збірае» выпускнікоў навучальнай установы ў жыццё. Акрамя адзення і рэчаў, што неабходныя ў паўсядзённым побыце, сіроты атрымліваюць банкаўскія карткі з залічанай на іх пэўнай сумай. Дзеці вучацца распараджацца грашыма, карыстацца сучасным плацёжным сродкам.
Для гасцей арганізавалі невялікую экскурсію па школе. Маршрут пралёг па спальных памяшканнях, вучэбных класах, майстэрнях, дзе сабрана таварная прадукцыя, створаная рукамі дзяцей. Вырабы сталярныя і швейныя, сувеніры запатрабаваны на рознага кшталту выставах, ярмарках, рэалізуюцца нярэдка па заказу. Большасць выпускнікоў школы-інтэрната атрымлівае разам з атэстатам аб сярэдняй адукацыі і дыплом, які дазваляе працаваць на вытворчасці сталяром, швачкай. А вось інтэрнатаўцы з задавальненнем наведваюць дзіцячую школу мастацтваў, фізкультурна-спартыўны комплекс, Дом рамёстваў, што знаходзяцца ў райцэнтры.
— Такое «ўзаемапранікненне» на карысць выхаваўчаму працэсу. Дзеці павінны вучыцца не толькі браць, але і аддаваць, вучыцца жыць у соцыуме,— лічыць Зоя Фаміна, намеснік старшыні райвыканкама. Яна часты госць у школе-інтэрнаце, а ў пераднавагоднія дні была ледзь не штодня. Сустракала разам з кіраўніцтвам установы тых, хто прыехаў падзяліцца з дзецьмі цеплынёй свайго сэрца.