«Рэліквія»
Артэфакты са сваіх фондаў прадставілі дамы рамёстваў вобласці для этнаграфічнай выставы-конкурсу «Рэліквія» у Віцебскім абласным метадычным цэнтры народнай творчасці.
Такая выстава ў мэтах агляду фондаў артэфактаў этнаграфіі, што былі сабраны супрацоўнікамі дамоў і цэнтраў рамёстваў з 15 рэгіёнаў Віцебшчыны, а таксама стымулявання цікаўнасці да збіральніцтва ўнікальных помнікаў побыту і традыцыйнай народнай культуры праводзіцца ўпершыню. Тут можна пабачыць набойку, маляванку, драўляную скульптуру, куфры, народны жывапіс і абразы, фрагменты народнага адзення і абутку, вырабы лозапляцення, вышыўку і ткацтва розных тэхнік і многае іншае.
Дырэктар АМЦНТ Кацярына Лабука падчас адкрыцця выставы адзначыла, што экспазіцыю можна лічыць яшчэ і юбілейнай, бо многія цэнтры і дамы рамёстваў сёлета адзначаюць кожны свой юбілей — хто 30, хто 25 год з дня заснавання.
Гэты набожнiк — з калекцыi Дома рамёстваў Вiцебскага раёна.
Выстава атрымалася цудоўнай і багатай і стварыла асаблівую атмасферу ў невялічкай зале, бо, як сказала дэкан мастацка-графічнага факультэта ВДУ імя П. М. Машэрава Галіна Бабровіч, калі знаходзішся побач з узорамі народнай творчасці, адчуваеш іх цеплыню. Кіраўнік прыйшла разам са сваімі юнымі студэнткамі, каб папулярызаваць народнае мастацтва ў маладзёжным асяроддзі.