ПТУШКА ГОДА-2021 Крылаты сімвал — ляляк
Грамадская арганізацыя «Ахова птушак Бацькаўшчыны» (АПБ) абрала птушкай новага года звычайнага ляляка (козодоя обыкновенного).
Ляляк мае памер, супастаўляльны з голубам, але ў яго даўжэйшы хвост ды размах крылаў да 64 сантыметраў. Хаця ляляка нельга назваць рэдкай птушкай (у Беларусі гняздуюцца 35–50 тысяч пар), але ўбачыць яго вельмі праблематычна. Ён майстар маскіроўкі. Яго апярэнне зліваецца з колерам лясной падсцілкі ці кары дрэва. Таму птушку, што нерухома сядзіць, даволі цяжка заўважыць на галіне альбо ў апалай пажоўклай лістоце. Яе можна пазнаць па своеасабліваму манатоннаму голасу. Дарэчы, гэта, відаць, адзіная птушка нашых лясоў, якая сядзіць не ўпоперак, а ўздоўж галін, бо мае надзвычай кароткія пальцы.
Яйкі лялякі адкладваюць проста на лясной падсцілцы, пераважна ў хвойніках. Таму часта яны становяцца здабычай наземных драпежнікаў.
Ляляк мае ўнікальную дзюбу. Яна можа надзвычай шырока раскрывацца. Птушка карыстаецца гэтым дарам прыроды для лоўлі ў палёце начных жукоў і матылькоў, а таксама для запалохвання ворагаў.
Зараз, узімку, у нашай краіне лялякаў няма — паляцелі ў цёплую Афрыку, зімуюць крыху на поўдзень за Сахарай. На радзіму яны вернуцца толькі напрыканцы красавіка.
Як лічыць старшыня Віцебскага гарадскога аддзялення АПБ дацэнт ВДУ імя П. М. Машэрава Галіна Захарава, у чаканні вяртання на радзіму нашага героя варта падумаць і пра іншых птушак, якія засталіся на зімоўку. Многія з іх патрабуюць нашай асаблівай увагі і дапамогі.
Так, штогод арганізацыя праводзіць у студзені акцыю «Птушкі ля кармушкі». Чым больш людзей паўдзельнічаюць у ёй, тым лепш атрымаецца адсочваць змены ў папуляцыях і сваечасова рэагаваць на іх пры патрэбе. Такі падыход называецца «народная навука», бо дзякуючы яму можна сабраць вялікі масіў дадзеных для аналізу. Падлічваць птушак на кармушках не цяжка і нават весела, таму ў акцыі можна ўдзельнічаць усёй сям’ёй разам з дзеткамі.