Каб раслі цяляты моцнымі і дагледжанымі
Заатэхнічная служба ААТ «Прыазёрны мір» Шумілінскага раёна ўпэўнена, што маладняк буйной рагатай жывёлы з самага нараджэння павінен утрымлівацца ў камфортных умовах — тады жывёла будзе расці здаровай і моцнай. Зыходзячы з гэтых меркаванняў, на ферме «Непароты» пабудавалі новы прафілакторый для цялят.
— Ранейшы прафілакторый не адпавядаў патрабаванням да ўтрымання маладняку, — расказаў дырэктар гаспадаркі Юрый Савіцкі. — А новы прасторны, з індывідуальнымі клеткамі для цялят, кармушкамі, якія размешчаны звонку, са спецыяльнымі сасковымі вёдрамі для паення, якія замацавалі на тэхналагічна апраўданай вышыні. Таксама набылі вёдры для выпойвання цялят большага ўзросту. Думаем, што новы прафілакторый будзе зручным як для ўтрымання жывёлы, так і для работы даярак.
Аб’ект пабудаваны гаспадарчым спосабам. Кіраваў працэсам прараб мясцовай будаўнічай брыгады Васіль Васілевіч.
— Прафілакторый узвялі літаральна за месяц, — паведаміў ён. — Задаволены дружнай работай Пятра Маліноўскага, Пятра Васілеўскага, Аляксея Карпушчанкі. Лясгас бесперабойна і па першым нашым патрабаванні пастаўляў будаўнічыя матэрыялы. Акрамя звычайных вокнаў, з полікарбанату зрабілі яшчэ некалькі і на даху. Так у прафілакторыі значна святлей, таму можна эканоміць электраэнергію.
У прафілакторыі, які разлічаны на 25 месцаў, ужо стаяць цяляты. А ўвогуле мяркуецца, што тут маладняк будзе знаходзіцца ад нараджэння да таго часу, пакуль не набярэ вагу да 70 кілаграмаў.