СЯМЕЙНАЯ СПРАВА Згода, павага і агульны свет захапленняў
Здараецца так, што сапраўднае мастацтва нараджаецца, жыве і зберагаецца ў родзе чалавека, яго сям’і, а цяга да творчасці перадаецца з пакалення ў пакаленне.
Выдатным прыкладам таму з’яўляецца сям’я Тузікавых з вёскі Хайсы Віцебскага раёна, у якой заўсёды пануе атмасфера незвычайнай цеплыні, а кожны яе член адораны талентам да спеваў ці танцаў.
Святлана Генадзьеўна, старэйшая прадстаўніца, нарадзілася ў Сакольніках Мазалаўскага сельсавета. У свой час скончыла Мазалаўскую сярэднюю школу, падчас вучобы была камсоргам класа і арганізатарам розных культурна-масавых мерапрыемстваў. За выдатныя веды і актыўную дзейнасць у 1973—1974 навучальным годзе атрымала пуцёўку ў Міжнародны піянерскі лагер «Зубраня». Гэты адпачынак стаў самай высокай узнагародай за школьныя гады і запомніўся на ўсё жыццё. Амаль сорак год адпрацавала Святлана Генадзьеўна на птушкафабрыках у Хайсах і Вярхоўі. За плённае і добрасумленнае выкананне сваіх абавязкаў неаднаразова была ўзнагароджана рознымі граматамі і падзякамі.
Разам з мужам Мікалаем Сяргеевічам (на вялікі жаль, у мінулым годзе ён пайшоў з жыцця) выхавалі дачок Інгу і Алу, якія шчыруюць так жа добрасумленна, як калісьці іх бацькі: Інга — медсястрой вышэйшай катэгорыі ў Віцебскай дзіцячай абласной клінічнай бальніцы, Ала — у Мазалаўскім сельскім доме культуры кіраўніком гуртка дэкаратыўна-прыкладнога мастацтва. Яны ўжо маюць свае сем’і, а Святлана Генадзьеўна — двух унучак Дар’ю і Анастасію і ўнука Паўла, якія таксама захапляюцца мастацтвам.
Прадстаўнікі творчай сям’і — актыўныя ўдзельнікі калектываў мастацкай творчасці Мазалаўскага СДК і дзіцячай школы мастацтваў: народнага жаночага клуба «Залаты ўзрост», тэатральнага калектыву «Вобраз», танцавальнага — «Калінка». Талент спяваць і танчыць перадаўся Святлане Генадзьеўне ад яе бацькоў, а ўжо ад яе — дзецям і ўнукам.
Ні адно сямейнае свята ў Тузікавых не абходзіцца без песень і жартаў, якія «нараджаюць» цікавыя жыццёвыя гісторыі і папаўняюць сямейны альбом новымі фотаздымкамі.
— Згода, павага адзін да аднаго, агульныя інтарэсы... Вось, што павінна быць у кожнай сям’і. І якое шчасце, што гэта ўсё ёсць у нас, — адзначыла Святлана Генадзьеўна падчас размовы. Здароўя і поспехаў вам, прадстаўнікі творчай сям’і, апантанай мастацтвам!