Nha subi saia, dixi kalsinha...
Banda meiu dia di un sabadu, rabespa di Anu Nobu, Txiku Titoi txiga Sukupira di Praia – maior feira di bujigangas di Kabu Verdi. Kabu staba xeiu ti boka di algen – vendedoris, konpradoris i kuriozus – i di bujigangas. Vendedoris ta tenta txoma atenson di tranziuntis. Konpradoris ta regatia presus. Kuriozus ta da odju kumida. I bujigangas ku dinheru ta troka di mon manenti manenti.
Txiku Titoi, omi ku serka di 30 anu di idadi, ba ta pasa si na un di kes baraka di rabidantis. Atrai se atenson, uns kalsinha di koris beranti ki staba stikadu na moldis di arami, ta langilangi na bentu. Ses djuntu, staba prindadu txeu saia, tanbe di koris vivu, ta sarakotia na bentu.
Txiku Titoi arma para si frenti kes kalsinha pa djobe-s midjor. Provavelmenti, Txiku Titoi sa ta imajinaba algen ki el konxe na un di kes kalsinha di tisidu poku – na verdadi, so ku uns tira stretu i un paninhu pa frenti.
Asin ki Txiku Titoi para si, txiga nel un rabidanti di ses 35 anu di idadi, raskoa, ku rostu kontenti:
- Boas-ora, freges! Es kalsinhas e di kualidadi – 100% algudon. Es ta fika bunitu na kunpanhera di-nho! N ten serteza! Nhu leba-l-es di prizenti! Kunpanhera di-nho ta fika-nho agradesida ki nhu ka ta imajina! – vendedera fla, ta djobe Txiku Titoi ku un olhar marotu...
Txiku Titoi ka fla nen po nen pedra. El suri pa rabidanti, el volta, a sigir, se atenson pa kes saia kurtu di pregas. Kantu vendedera odja ma Txiku Titoi pasa ta izamina saias, vendedera ba faxi pega un di kes saia prindadu i fika ta siridja-l ku dedu:
- Nhu pega es saia plisadu li, nhu xinti. Bon material – e saia tirileni! Ti ki batidu, basta seka-l stikadu prega pa riba, ka meste liza-l! Nhu leba kunpanhera di-nho saia ku kalsinha! Es saias ku kalsinhas, nu tene-s di tudu tamanhu i kor. E so skodje sugundu korpu i gostu di kunpanhera di-nho. Nhu ka ta rapende. N ta pusta ku nho!
Txiku Titoi so riaji ku un surizu pa rabidanti, ki sa ta kontinuaba ta djobe pa Txiku Titoi ku un ar di brajera, sima ki el kreba fla-l:
- Kunpanhera di-nho ta fika seksi dentu di un di kes kalsinha la ku un di kes mini-saia li!
Kantu rabidanti nota ma interesi di Txiku Titoi sa ta aumenta, rabidanti faze Txiku Titoi es pruposta li:
- Si nhu kunpra-m 1 di kes saia li ku 1 di kes kalsinha la, N ta faze-nho un presu spesial! – rabidanti ponta dedu pa kel kalsinha ki Txiku Titoi sa ta djobeba na prinsipiu.
Txiku Titoi papia, finalmenti, dipos di pega saia pa el xinti kualidadi di material:
- Npos, si N kunpra 1 di kes saia li ku 1 di kes kalsinha la, kantu ta fika saia i kalsinha, tudu djuntadu? – Txiku Titoi ponta dedu pa kel kalsinha ki el sa ta djobeba na prinsipiu.
Txiku Titoi dja kumesaba mostra abertamenti ma el kreba kunpra kes 2 pesa di vistuariu pa mosas. Rabidanti fika mas entuziasmada na konvense freges:
- N ta faze-nho-es baratinhu: kalsinha 500, saia 1500. Baratinhu!
Txiku Titoi djobe ku mas atenson kes 2 pesa di vistuariu. El djobe-s ti te, pensa un bokadu, el suri pa rabidanti, el da rinkada sen fla mas nada.
Rabidanti kore tras di Txiku Titoi, ba pega-l na mon, puxa-l di mansinhu si, torna traze-l ku karinhu pa frenti di se baraka:
- Ka nhu ba sen nu faze nogosi!
Nhu spera, N ta faze-nho un presu inda mas en konta: saia 1600, kalsinha 400! Prontu! Ka ten kau di dixi mas ki si! E pega o larga!
Txiku Titoi djobe mudjer dentu di odju tan, ratxa uma grasa!
Rabidanti riaji ku tudu morabeza:
- Nha freges, ka nhu ri, nau! Es presu e spesial me! Kuazi N ka ta ganha nada.
Txiku Titoi arma suste grasa, po tudu 2 mon na koxa, kumesa papia ku un ar entri seriu i brajeru:
- Mas, mudjer, modi ki nha ta ben faze-m un kuza di kel li?! Ami e un omi kazadu! Ma ndis ta fladu: rabidanti, ka nha rabida-m nha vida! Ka nha ntenta-m, mudjerrr!!!
Rabidanti da pa dodu, finji un ar di algen spantadu, po tudu 2 mon na koxa tanbe i riaji:
- Eh!!! Freges, ka nhu fla!! Modi ki N sa ta ntenta-nho?!
Nton, Txiku Titoi, ku un ar marotu, kudi rabidanti, enkuantu ku jestu el ba ta sklarese se pensamentu:
- Nha subi saia, dixi kalsinha...
Marsianu nha Ida padri Nikulau Ferera