Betú ataka alfabetu kabuverdianu ofisial (IV)
Nes artigu lisin https:// tinyurl.com/5x5h9kcw , Adalberto Silva ta ataka alfabetu kabuverdianu ofisial (ex-ALUPEC) alegandu ma es alfabetu ka ta rispeta storia di lingua maternu kabuverdianu (lkv) nen nisisidadi di koabitason ku lingua purtuges. Atraves di ensaius, N sa ta aponta alguns inverdadi, falasia i inkuerensia ki sta nes artigu (konfiri 3 ensaiu anterior lisin: https://tinyurl.com/2p8m5f3z ).
Ifetivamenti, na nha ensaiu publikadu na idison di es benditu jornal di 09-12-2021 i intituladu “Betú ataka alfabetu kabuverdianu ofisial” , N aponta alguns inverdadi, falasia i inkuerensia ki sta na artigu supra di Betú i rilasionadu ku alegasons supra. Na nha ensaiu publikadu na idison di es benditu jornal di 23-12-2021 i intituladu “Betú ataka alfabetu kabuverdianu ofisial (II)” , N aponta alguns inverdadi, falasia i inkuerensia ki sta na artigu supra di Betú i rilasionadu ku es alegasons: a) ma tudu Kabuverdianu di bon sensu ta difende valorizason di lkv; b) ma alfabetu kabuverdianu ofisial (ex-ALUPEC) ka e konsensual; i d) ma ka pode fazedu ofisializason di un lingua sen se padronizason previu. Na nha ensaiu publikadu na idison di es benditu jornal di 13-01-2022 i intituladu “Betú ataka alfabetu kabuverdianu ofisial (III)”, N aponta es falasia ki sta na artigu supra di Betú: ma ka e pusivel un padronizason di lkv undi ta konsideradu tudu ses varianti.
Oji, N ta ben aponta alguns otu inverdadi ki sta na artigu supra di Betú i rilasionadu ku alfabetu kabuverdianu ofisial.
Atraves di es frazi “E isso pressuporia a assunção definitiva do Alupec, apesar de não ser consensual!”, Betú sa ta afirma disimuladamenti ma inda Stadu ka asumi difinitivamenti alfabetu kabuverdianu. Kel li e un inverdadi, pois atraves di Dikretu-Lei nº 67/98, di 31-12-1998, Stadu adota nos alfabetu a titulu SPERIMENTAL, i atraves di Dikretu-Lei nº 8/2009, di 16-03-2009, Stadu adota nos alfabetu a titulu DIFINITIVU (konfiri, rispetivamenti, lisin https://tinyurl. com/2xsjt5t7 ku lisin https:// tinyurl.com/tv9z29ed ).
Ifetivamenti, Artigu 1º di Dikretu-Lei nº 8/2009 ta fla kel li:
“1. O Alfabeto Unificado para a Escrita da Língua Cabo-verdiana (ALUPEC), aprovado, em regime experimental, pelo Decreto-Lei nº 67/98, de 31 de Dezembro, é instituído como Alfabeto Cabo-verdiano.
2. O Alfabeto Cabo-verdiano funciona como um sistema gráfico nacional para a escrita da língua cabo-verdiana.” (sic)
Purtantu, Dikretu-Lei nº 8/2009 institui ex-ALUPEC komu alfabetu kabuverdianu dipos di 10 di speriensia. Ka sa ta falta ninhun midida legal pa ifeitu di ofisializason di nos alfabetu! Dikretu-Lei nº 8/2009 dja ofisializa nos alfabetu. Betú sa ta konfundi se dizeju ku rialidadi. Kel li ta mostra mas un bes ma Betú ka ten kondison pa ser Konselheru di Primeru-Ministru.
Betú ta karapati na “Alupec se baseia no princípio fonológico de associar a cada som uma letra” (ki e un difinison sinplista), pa afirma ma digrafus (dj, lh, nh i tx) e un exsepson a es prinsipiu fonolojiku. Kel li e un inverdadi, pois, difinison SIENTIFIKU di prinsipiu fonolojiku e univosidadi entri fonema i grafema. Ora, grafema pode ser letra o digrafu o trigrafu. Alias, ti Alfabetu Fonetiku Internasional (referensia mundial di prinsipiu fonolojiku) ten digrafu (pa izenplu: [tʃ ] ki nu ta riprizenta ku tx). Ku otus palavra, Betú ka ta dumina konseitus baziku di fonetika.
Betú ta alega ma pa justifika uzu di “K” pa riprizenta son [k] ma “o argumento normalmente utilizado é o presumível simbolismo africano da letra ‘k’”. Kel li e un inverdadi, pois na propi Dikretu-Lei nº 67/98 sta SPRESAMENTI ma K skodjedu pabia el ta asigura korispondensia univuku entri fonema [k] i grafema K (konfiri “BASE IX” in fine). Ku es inverdadi, Betú kre tra partidu di averson pa kuzas afrikanu di alguns Kabuverdianu daltoniku (daltoniku, pois nos kor e predominantimenti pretu...). Ifetivamenti, Purtugezis straga “C”, pois “C” di alfabetu latinu ta asigura korispondensia univuku entri fonema [k] i grafema C, mas C di alfabetu purtuges ka ta asigura es univosidadi (C purtuges ta riprizenta son [k] ku son [s]). Repristinason di univosidadi di C, na nos anbienti di koabitason entri purtuges i kriolu, al trazeba kriansas, isu sin, un difikuldadi ivitavel (lida ku un letra ki ta konporta diferentimenti na purtuges i na kriolu). Provavelmenti Betú ka ten kapasidadi tekniku pa nxerga es difikuldadi.
Marsianu nha Ida padri Nikulau Ferera