Angut ammalu Arnaq Aivvagasuttuuk
1979
Leah Qumaalup 1934–2010) Angut ammalu Arnaq Aivvagasuttuuk piujurjuaraaluulluni ujararmut titiqtugaliangusimammat. Angijualuk, aivialuk qanuilingammangaaq nalunanngittualuk saanganiittuq alaqtuni taakkua aippariik tirliarsisaarasunniaqtuuk taassuminga uumajumik isumaaluttuujaaqtutik kappiasuttuujaaqtutillu irsigijaaluanik. Isumaalunningik nalunanngitiaqtuuk tavvani. Sulillattaaqtumik titiqtugarsimajuq, ammalu Qumaaluk takutittilluni ippinniagijaujunit qanuq kikkutuinnait ippigususuungummangaata asivaraimmata.
Kisianili, takujuminarutigiluannguaqtanga taassuma titiqtugaup aaqqitiarsimaninga. Qumaaluk atursimammat mikijuutinit qakuqtanit ujjirnarsitittisimalluni namut saanngammangaata miqqungit inunnguap annuraanginni. Amittukutaangullutik angutiup Kamingik ujjirnarngat miqqungit namut saanngammangaata ammut arnaulli atuqtangit ajjigimminanigit, sanningammatali talirpianit saumianut. Qaujimajanginnik amisualunnit takutittisimammat tavvani titiqtugarmi, ilagijaullutik piqqusiqtigut annuraarisuungit, ujjirnaqtusaunngittut sivullirmi takugiannarlugu.
Pijariatugijara tukisinattugu summat taanna titiqtugaq angiqtauninngimmangaaq. Uvannulli, naamattiarngat. Suqquisuttunga ilangit piujuutirjuaraaluit titiqtugait ippigijausimanngimmata katimajiuqataujunut Katimajinit. Tukisigaluaqtunga turaagaqarnirngata sapujjinasuttutik niurrutiqarvimmik, immaqa amisuuluaqtualunniqqai qimirruvannirngata ajjinit tuaviqtutik tamaatigi nalunaijarsimattiaqtumik, tukisinaqtumik titiqtugarmik tassumingatitut isumassarsiurutiqaluarninngilat isumagijaugiaqallarittuminiutillugu.