ᐳᕕᕐᓂᖅᑑᖅ, ᓄᓇᕕᒃ, ᑯᐸᐃ
ᓕᕙᐃ ᖁᒫᓗᒃ (1919–1997)
ᐳᕕᕐᓂᖅᑑᒥᑦ ᑯᐊᐸᒃᑯᑦ, ᒪᑐᐃᖅᑕᐅᓚᐅᖅᓯᒪᔪᖅ 1960- ᐅᑎᓪᓗᒍ, ᓯᕗᓪᓕᖅᐹᖑᖃᑕᐅᓚᐅᖅᓯᒪᔪᖅ ᓴᓇᐅᒐᓕᐅᖅᑎᓄᑦ ᑯᐊᐸᒋᔭᐅᓪᓗᓂ ᓄᓇᕕᖕᒥᑦ. ᐃᓅᓯᕆᔭᐅᓚᐅᖅᑐᑦ ᐳᕕᕐᓂᖅᑑᒥᑦ ᑯᐊᐸᒃᑯᖏᓐᓂᒃ ᐃᓚᖃᓚᐅᖅᐳᑦ ᓕᕙᐃ ᖁᒫᓗᒃᒥᑦ (1919–1997), ᐊᐃᓴ ᖁᐱᕐᕈᐊᓗᒃ (1916–2004), ᓴᕐᓕ ᓯᕗᐊᕌᐱᒃ (1911– 1968) ᐊᒻᒪᓗ ᐲᑕ ᐊᒪᐅᑎᒃ ᑖᒃᑯᐊ ᐊᒃᓱᕈᖅᖢᑎᒃ ᓴᓇᖃᑦᑕᓚᐅᖅᓯᒪᔪᑦ ᐱᒋᐊᖅᑎᑦᑎᓪᓗᑎᒃ ᓴᓇᐅᒐᓕᐅᕐᓂᕐᒥᒃ ᐊᒻᒪᓗ ᓴᖅᑭᑎᑦᑎᓪᓗᑎᒃ ᐃᓚᒋᔭᐅᓕᕐᓂᕐᒥᒃ ᑯᐊᐸᒃᑯᓐᓂᑦ ᑖᒃᑯᐊ ᓂᐅᕕᖅᑎᒃᑯᑦ ᐅᖃᓚᐅᖅᑎᓪᓗᒋᑦ ᐃᓱᒪᖃᕐᓂᕌᖅᖢᑎᒃ ᓂᐅᕕᕈᒪᓪᓗᑎᒃ ᑕᕝᕙᓂ ᓄᓇᓕᖕᓂ ᓴᓇᐅᒐᓂᒃ ᐊᒻᒪᓗ ᓴᓇᐅᒐᓕᐊᒍᔪᓂᒃ. ᑕᕝᕙᓂ ᓄᓇᓕᖕᒥᐅᑦ ᐊᖑᑎᑦ ᓲᕐᓗ ᐲᑕ ᒨᑖᒃ ᐊᒻᒪᓗ ᐊᑖᑕ ᐋᓐᑕᕆ ᔅᑕᐃᓐᒪᓐ ᐃᑲᔪᓕᓚᐅᖅᓯᒪᔪᑦ ᑖᒃᑯᓂᖓ ᓴᓇᐅᒐᓕᐅᖅᑎᓂᒃ ᐃᓕᓐᓂᐊᖅᑎᑦᑐᒪᓪᓗᓂᒋᑦ ᐊᑐᕆᐊᖃᖅᑕᖏᑦ ᖃᐅᔨᓴᖅᑕᐅᒋᐊᖃᕐᓂᖏᓐᓂᒃ ᑕᐃᒪᓐᓇ ᐃᖏᕐᕋᓂᖃᑦᑎᐊᖅᑐᒥᒃ ᐊᐅᓚᓂᖃᑦᑎᐊᖅᑐᒥᒃ ᑯᐊᐸᖃᕐᓂᐊᕐᒪᑕ. ᑕᒃᑯᐊ ᐃᓄᐃᑦ ᓴᓇᐅᒐᓕᐅᖅᑏᑦ ᐊᐅᓚᖃᑎᖃᖃᑦᑕᖅᑐᑦ ᐊᑖᑕ ᔅᑕᐃᓐᒪᓐᒥᒃ ᖃᓪᓗᓈᑦ ᓄᓇᖓᓐᓄᑦ ᓲᕐᓗ ᑐᕌᕐᑐᒧᑦ, ᒪᓐᑐᕆᐊᒧᑦ, ᑯᐸᐃᒥᑦ, ᐊᒻᒪᓗ ᐱᑦᔅᐴᕐᒧᑦ, ᐱᓐᓱᕕᓂᐊᒥᑦ, ᖃᐅᔨᓴᕐᓗᑎᒃ ᖃᓄᖅ ᐱᕈᖅᑎᑦᑎᔪᓐᓇᕋᔭᕐᓂᖏᓐᓂᒃ ᐃᓄᐃᑦ ᓴᓇᐅᒐᖏᓐᓂᒃ ᓂᐅᕕᖅᑕᐅᖃᑦᑕᕋᔭᕐᓂᖏᓐᓂᒃ. ᑕᐃᒪᓕ ᐱᕈᖅᐸᓪᓕᐊᒻᒪᕆᓕᖅᖢᑎᒃ ᐃᒻᒪᖃ 60− ᓂᒃ ᓂᐅᕕᕐᕕᖃᓕᖅᖢᑎᒃ ᑲᓇᑕᓕᒫᒥᑦ ᐊᒻᒪᓗ ᐊᒥᐊᓕᑲᒥᑦ, ᓕᕙᐃ ᖁᒫᓗᒃ ᓴᓇᖑᐊᖅᑎᒻᒪᕆᐅᓚᐅᖅᑐᖅ ᐊᒻᒪᓗ ᑎᑎᕋᐅᔭᖅᑎᐅᓪᓗᓂ ᐳᕕᕐᓂᖅᑑᒥᐅᑕᐅᓪᓗᓂ, ᓄᓇᕕᒃᒥᑦ, ᑯᐸᐃᒥᑦ. ᑯᐊᐸᖃᓕᓵᖅᑎᓪᓗᒋᑦ ᖁᒪᓗᒃ ᑐᓂᓯᖃᑦᑕᓚᐅᖅᑐᖅ ᑮᓇᐅᔭᓂᒃ ᓴᓇᖑᐊᑕᒥᓄᑦ ᑮᓇᐅᔭᖅᑖᕆᖃᑦᑕᖅᑕᒥᓄᑦ ᑯᐊᐸᑯᓐᓂᑦ ᓴᓇᔪᑦ ᐊᑭᓕᖅᑕᐅᖃᑦᑕᕐᓂᐊᕐᒪᑕ, ᑖᒃᑯᐊᓗ ᓴᓇᔨᐅᔪᑦ ᑯᐊᐸᒃᑯᓐᓂᑦ ᐊᑭᓕᖅᑕᐅᔮᖏᒻᒪᑕ.
ᑯᐊᐸᒃᑯᑦ ᐱᒋᐊᖅᑎᑕᐅᓚᐅᖅᓯᒪᔪᖅ ᓴᓇᖑᐊᖅᑎᐅᔪᓂᒃ, ᐊᑖᑕᒐ ᐃᓚᒋᔭᐅᓪᓗᓂ, ᐊᐃᓴ [ ᖁᐱᕐᕈᐊᓗᒃ], ᐊᒻᒪᓗ ᐊᒃᑲᒐ ᓕᕙᐃ [ ᖁᒫᓗᒃ]. ᐱᒋᐊᖅᑎᑕᐅᓚᐅᖅᓯᒪᖏᑦᑐᕐᓕ ᐊᑕᐅᓯᕐᒥᒃ ᐱᓕᕆᔨᐅᔪᒥᒃ ᐅᕝᕙᓘᓐᓃᑦ ᐊᐅᓚᑦᑎᔨᐅᔪᒥᒃ, ᑭᓯᐊᓂᓕ ᐊᒥᓱᐸᓗᖕᓂᒃ ᐊᖑᑎᓂᒃ ᑲᑎᑦᑐᒪᓚᐅᖅᓯᒪᔪᓂᒃ ᐃᑲᔪᕈᒪᓪᓗᑎᒃ ᐃᒻᒥᓂᒃ ᓂᐅᕐᕈᑎᖃᕈᒪᓪᓗᑎᒃ ᓴᓇᖑᐊᖅᑕᒥᓂᒃ ᐊᑭᒋᒋᐊᖃᖅᑕᖏᓐᓂᒃ ᐊᑭᖃᖅᑎᖢᓂᒋᑦ. ᓱᓕ ᐅᕙᖓ ᓄᑲᑉᐱᐊᑯᓘᓚᐅᖅᐳᖓ ᒪᑐᐃᖅᓯᑎᓪᓗᒋᑦ ᑯᐊᐸᒃᑯᓐᓂᑦ, ᑭᓯᐊᓂᓕ ᑖᒃᑯᓇᖓᑦ ᐊᖑᑎᓂᒃ ᐃᓕᓐᓂᐊᒻᒪᕆᓚᐅᖅᓯᒪᕗᖓ. ᐱᓗᐊᖅᑐᒥᒃ ᐃᓕᑦᑎᓚᐅᖅᓯᒪᕗᖓ ᐊᒃᑲᓐᓂᒃ ᐊᒻᒪᓗ ᐊᑖᑕᑦᑎᐊᓐᓂᒃ, ᖁᒫᓗᒃᒥᑦ. ᐃᖅᑲᐅᒪᔪᖓ ᓯᕗᓪᓕᖅᐹᒥᒃ ᓴᓇᖑᐊᕋᓱᒃᑎᓪᓗᖓ, ᐅᑭᐅᖃᓚᐅᖅᓯᒪᕗᖓ ᑎᓴᒪᓂᒃ. ᑕᐅᑐᖃᑦᑕᓚᐅᕋᒃᑯ ᐊᑖᑕᑦᑎᐊᕋ ᐊᒻᒪᓗ ᐊᐱᕆᓚᐅᖅᓯᒪᔭᕋ ᓂᐅᕕᕈᔾᔭᐅᔪᒪᓪᓗᖓ ᓂᐅᕐᕈᑎᒋᒍᓂᐅᒃ ᓴᓇᖑᐊᖅᑕᖓ. ᐅᖃᓚᐅᖅᓯᒪᔪᖅ ᐃᒪᓐᓇ, “ᐋᒃᑲ, ᐃᓕᖕᓄᑦ ᐱᔾᔮᖏᑦᑐᖓ; ᓂᐅᕕᕐᕕᖕᒥᑦ ᐱᔪᒪᒍᕕᑦ ᐃᕝᕕᑦ ᓇᖕᒥᓂᖅ ᓴᓇᖑᐊᕆᐊᖃᖅᑐᑎᑦ.” ᖃᐅᔨᒪᓚᐅᕐᒪᑦ ᑕᒫᓂᖏᓐᓇᔾᔮᖏᓐᓇᒥ ᐃᓅᓯᓐᓂ ᑕᐃᒪᓕ ᐃᓕᓐᓂᐊᖅᑎᓚᐅᖅᐹᖓ ᓴᓇᖑᐊᕐᓂᕐᒥᒃ. ᑕᐃᒪᓕ ᓴᓇᖑᐊᕋᓱᖃᑦᑕᓕᓚᐅᖅᓯᒪᕗᖓ. ᓴᓇᖑᐊᓚᐅᖅᓯᒪᔪᖓ ᐊᖑᑎᖑᐊᕐᒥᒃ ᐊᒻᒪᓗ ᑕᐃᒪ ᐱᐊᓂᓚᐅᖅᓯᒪᔭᖓ ᐅᕙᓐᓂᒃ ᐃᑲᔪᖅᖢᓂ. ᐊᖓᔪᒐᓗ ᐅᕙᖓᓗ ᐃᓕᓐᓂᐊᓚᐅᖅᓯᒪᔪᒍᒃ ᓴᓇᖑᐊᕐᓂᕐᒥᒃ ᑕᐅᑐᒃᐸᒃᖢᑕ ᐊᖓᔪᖅᑳᑦᑎᓐᓂᒃ, ᐊᒃᑲᑦᑎᓐᓂᒃ ᐊᒻᒪᓗ ᐊᑖᑕᑦᑎᐊᑎᓐᓂᒃ ᐊᒻᒪᓗ ᐊᑖᑕᑦᑎᓐᓂᒃ.
ᐲᑕ ᓄᑲᑉᐱᐊᖅ ᐃᑦᑐᑲᓪᓚᒃ, ᓴᓇᖑᐊᖅᑎᐅᔪᖅ ᐊᒻᒪᓗ ᐊᖑᓇᓱᖕᓂᕐᒧᑦ ᖃᐅᔨᒪᔨᐅᓪᓗᓂ