ᐅᓗᒃHᐊᒃᑐᖅ, ᐃᓄᕕᐊᓗᐃᑦ ᓄᓇᓕᖓ, ᓄᓇᑦᑎᐊᖅ
Hᐃᓕᓐ ᑲᓪᕙᒃ CM, RCA (1901–1984)
ᐅᓗᒃᕼᐊᒃᑑᖅ ᐃᓄᐃᑦ ᑯᐊᐸᒃᑯᖏᑦ ᓴᖅᑭᑕᐅᓚᐅᖅᓯᒪᔪᖅ 1961− ᖑᑎᓪᓗᒍ. ᓯᓚᕐᔪᐊᕐᒥᐅᓕᒫᓂᒃ ᖃᐅᔨᒪᔭᐅᒻᒪᕆᒃᑐᖅ Hᐃᓕᓐ ᑲᓪᕙᒃ, CM, RCA (1901–1984) ᐊᒻᒪᓗ ᐊᓕᒃ ᐊᓕᒃᓇᒃ ᐹᓐᔅᓚᓐ (1928–1998) ᓴᓇᖃᑎᖃᖅᐸᓚᐅᖅᓯᒪᔫᒃ ᑕᕝᕙᓂ ᓄᓇᓕᖓᓂᑦ ᑖᔅᓱᒥᖓ ᐊᑖᑕ Hᐃᓐᕆ ᑖᕐᑎᒥᑦ ᓴᖅᑭᑎᑦᑎᓪᓗᑎᒃ ᓴᓇᐅᒐᓕᐅᕐᕕᖕᒥᑦ ᑯᐊᐸᖓᓂᑦ ᐃᑲᔪᕈᑕᐅᓇᓱᒃᖢᓂ ᐃᓚᒌᓄᑦ ᑮᓇᐅᔭᓕᐅᕈᑎᒃᓴᖏᓐᓂᒃ ᑕᕝᕙᓂ ᓄᓇᓕᖓᓂᑦ. ᑕᑯᓪᓗᒋᑦ ᐱᕙᓪᓕᐊᓂᖃᑦᑎᐊᓚᐅᕐᓂᖏᓐᓂᒃ ᑕᒪᒃᑯᐊ ᓴᓇᐅᒐᓕᐅᖅᑎᑦ ᑭᙵᕐᒥᐅᑦ, ᓄᓇᕗᒻᒥᑦ, ᐱᓇᓱᒍᒪᓕᓚᐅᖅᓯᒪᔪᑦ ᐊᐅᓪᓚᖅᑎᑦᑎᔪᒪᓪᓗᑎᒃ ᓴᓇᖃᑕᐅᓂᐊᖅᑐᓂᒃ ᑕᕝᕙᓂ ᑲᓇᑕᒥ ᐃᓄᐃᑦ ᓴᓇᐅᒐᓕᐅᖅᑎᓄᑦ ᑲᑎᒪᔨᓂᒃ ᐊᒻᒪᓗ ᓴᖅᑭᑎᑦᑎᔪᒪᓪᓗᑎᒃ ᐱᓕᕆᖃᑎᒌᒍᑕᐅᓂᐊᖅᑐᒥᒃ ᑖᒃᑯᓂᖓ. ᐊᑖᑕ ᑖᕐᑎ ᐅᖃᓚᐅᖅᓯᒪᔪᖅ 1978− ᖑᑎᓪᓗᒍ ᐊᐱᖅᓱᖅᑕᐅᑎᓪᓗᒍ ᑖᒃᑯᓄᖓ ᑲᓇᑕᒥ ᐃᓄᐃᑦ ᓴᓇᐅᒐᓕᐅᖅᑎᓄᑦ ᐃᓚᒋᔭᐅᔪᒧᑦ ᒥᐊᓕ ᔅᐹᕐᓕᖕᒧᑦ ᓴᓇᔭᐅᖃᑦᑕᖅᓯᒪᔪᓂᒃ ᓴᓇᐅᒐᓕᐅᖅᑐᒧᑦ ᑲᓪᕕᒃᒧᑦ. ᐹᓐᔅᓚᓐ ᐊᒻᒪᓗ ᐋᒡᓂᔅ ᓇᓄᒐᖅ ᑖᒃᑯᐊ ᐊᔾᔨᐅᖏᒻᒪᕆᓚᐅᖅᓯᒪᖕᒪᑎᒃ ᑕᐃᒪᓕ ᐊᐅᓚᖅᑎᑦᑎᓪᓗᑎᒃ ᓴᓇᔭᑯᓂᕐᒥᓂᒃ ᑖᒃᓄᖓ ᑲᓇᑕᒥ ᐃᓄᐃᑦ ᓴᓇᐅᒐᓕᐅᖅᑎᓄᑦ ᑲᑎᒪᔨᖏᓐᓄᑦ ᖃᐅᔨᓴᖅᑕᐅᖁᔨᓪᓗᑎᒃ ᓴᓇᔭᒥᓂᒃ, ᑖᒃᑯᐊ ᑲᑎᒪᔩᑦ ᐅᒃᐱᕈᓱᒻᒪᕆᓚᐅᖅᓯᒪᕗᑦ ᑖᒃᑯᐊ ᓴᓇᔭᖏᑦ ᐱᔭᕆᑐᔪᒻᒪᕆᐅᓂᖏᓐᓂᒃ ᐃᓄᖕᓄᑦ ᓴᓇᐅᒐᓕᐅᖅᑎᓄᑦ ᐃᑲᔪᖅᑕᐅᖏᑦᑎᐊᖅᖢᑎᒃ ᓴᓇᐅᒐᓕᐅᕐᓂᕐᒧᑦ ᐊᒻᒪᓗ ᐊᒃᑐᐃᒻᒪᕆᒃᖢᑎᒃ ᖃᓪᓗᓈᑦ ᓴᓇᐅᒐᓕᐅᕐᕕᖓᓂᑦ ᐃᖅᑲᓇᐃᔭᖅᑎᐅᔪᓄᑦ.
ᓴᓇᐅᒐᓕᐅᖃᑦᑕᓕᓚᐅᖅᓯᒪᕗᖓ ᑯᐊᐸᒃᑯᓐᓂ ᓱᓕ ᓴᓇᓚᐅᖏᓪᖢᖓ, ᐃᑲᔪᖅᐸᒃᖢᖓ ᐊᑖᑕᓐᓂᑦ ᐊᒻᒪᓗ ᐊᑦᑕᓐᓂᒃ ᒪᒃᑯᒃᑑᑎᓪᓗᖓ ᓴᓇᕙᒃᖢᖓ ᕿᔪᖕᓂᒃ ᐊᒻᒪᓗ ᐅᔭᖅᑲᓂᒃ ᐅᒃᑯᓯᒃᓴᓂᒃ. ᑕᐃᒪᓕ ᐊᐱᕆᔭᐅᓕᓚᐅᖅᓯᒪᕗᖓ ᓴᓇᔪᒪᒋᐊᒃᓴᖅ ᑕᐃᑲᓂ ᓴᓇᐅᒐᓕᐅᕐᕕᖕᒥᑦ ᐊᒻᒪᓗ ᐊᖏᓚᐅᖅᐳᖓ. ᑕᐃᒪᓕ ᓴᓇᖃᑕᐅᖃᑦᑕᓕᓚᐅᖅᓯᒪᕗᖓ ᐅᑯᓂᖓ ᐃᐊᓪᓯ ᒃᓕᔨᓐᐴᒡ, ᒨᓇ ᐅᕼᐅᕕᓗᒃ, ᐊᒻᒪᓗ Hᐃᐅᕆ ᐃᒍᑕᖅ−ᑖᓐᓇᓗ ᐱᒋᐊᖅᑎᑦᑎᓚᐅᖅᓯᒪᔪᖅ ᓯᕗᓪᓕᖅᐹᒥᑦ ᐅᓗᒃHᐊᖅᑑᒥᑦ ᑎᑎᕋᐅᔭᖃᕐᕕᐊᓂᑦ ᑲᑎᖅᓱᖅᑕᐅᓯᒪᔪᓂᒃ−ᐊᒻᒪᓗ ᐊᓯᖏᑦ ᐃᓐᓇᑦᑎᐊᕚᓗᖕᓂᒃ ᓲᕐᓗ ᐲᑕ ᐸᓪᕕᒃ ᐊᒻᒪᓗ Hᐃᓕᓐ ᒃᓕᓐᒋᓐᐴᒥᑦ. ᑖᒃᑯᐊ ᐃᓐᓇᕆᔭᐅᓚᐅᖅᓯᒪᔫᒃ ᐱᒋᐊᖅᑎᑦᑎᓪᓗᑎᒃ ᑎᑎᕋᐅᔭᖅᓯᒪᔪᓂᒃ. ᑖᒃᑯᐊᒃ ᐃᔾᔪᐊᖅᓯᔾᔪᑎᒋᓕᓚᐅᖅᓯᒪᔭᒃᑲ. ᓴᓇᖃᑦᑕᖅᑕᕕᓂᖏᑦ [ ᑕᑯᒃᓴᐅᔪᑦ] ᐊᓂᒃᑳᓂᒃ ᐱᓯᒪᔪᓂᒃ ᖃᓄᖅ ᐃᓅᓯᖃᓚᐅᕐᓂᖏᓐᓂᒃ. ᐊᒻᒪᓗ ᑕᒪᒃᑯᐊ ᓴᓇᔭᕕᓂᖏᑦ ᐱᐅᔪᒻᒪᕆᐊᓘᓪᓗᑎᒃ. ᐃᓚᖓᓐᓂᑦ ᐃᓕᑦᑎᔾᔪᑎᒋᓚᐅᖅᑕᕋ ᑖᒃᑯᓇᖓᑦ ᑭᖑᓪᓕᐅᔪᓂᒃ ᓴᓇᐅᒐᓕᐅᖅᑎᓂᒃ ᓴᓇᓪᓗᓂ ᐃᒻᒥᓂᒃ ᑕᕐᓂᖓᓂᒃ ᐱᔪᒥᒃ, ᐊᒃᓱᐊᓗᒃ ᐱᐅᒻᒪᕆᖃᑦᑕᖅᑐᑦ ᐊᒻᒪᓗ ᐊᒃᑐᐊᓂᖃᖅᖢᓂ ᐊᓯᖏᓐᓄᑦ ᐃᓄᖕᓄᑦ. ᑖᐃᒃᑯᐊ ᐃᓚᒋᔭᕗᑦ ᓴᓇᐅᒐᓕᐅᖅᑏᑦ ᐃᒻᒥᓐᓄᑦ ᐱᐅᓯᒋᐊᖅᑎᑦᑎᔾᔪᑎᒻᒪᕆᐅᔪᖅ−ᓴᓇᖃᑦᑕᖅᑕᑦᑎᓐᓄᑦ ᐊᒻᒪᓗ ᐱᐅᔪᒻᒪᕆᖕᓂᒃ ᐃᒃᐱᒍᓱᖕᓂᖃᓕᖅᐸᒃᖢᑕ.
ᖁᕕᐊᓇᑦᑎᐊᓚᐅᖅᓯᒪᔪᖅ ᑕᕝᕙᓃᖢᖓ ᔭᓯ ᐅᓈᑉ ᓴᓇᐅᒐᖃᕐᕕᐊᓂᑦ [ ᐊᒻᒪᓗ] ᖃᒪᓂᑦᑐᐊᕐᒦᖢᖓ ᑕᑯᓪᓗᖓᓗ ᑖᔅᓱᒪ ᐅᓈᑉ ᓴᓇᔭᖏᓐᓂᒃ. ᑕᕝᕙᓂ ᓴᓇᐅᒐᖃᕐᕕᖕᒥ ᐊᖏᔪᐊᓗᖕᓂᒃ ᓴᓇᖑᐊᖅᑕᐅᓯᒪᔪᓂᒃ ᐱᑕᖃᖅᑐᖅ ᐊᒻᒪᓗ ᑎᑎᕋᐅᔭᖅᑕᐅᓯᒪᔪᓄᑦ ᓴᓇᔾᔪᑕᐅᓪᓗᑎᒃ. ᖁᕕᐊᓇᒻᒪᕆᒃᑐᖅ ᐅᕙᑦᑐᑦ ᓴᓇᐅᒐᓕᐅᖅᑎᐅᓪᓗᖓ ᑕᐃᒪᐃᑦᑐᓂᒃ ᑕᑯᓪᓗᓂ. ᑕᑯᔪᓐᓇᑦᑎᐊᖅᐳᓯ ᑖᔅᓱᒪ ᐅᓈᑉ ᐱᒋᐊᖅᑎᓚᐅᖅᓯᒪᔭᖏᓐᓂᒃ ᓄᓇᓕᖕᒥᐅᓄᑦ. ᐱᕙᓪᓕᐊᖃᑕᐅᓪᓗᖓᓗ ᓴᓇᐅᒐᓕᐊᓂᒃ ᐃᓚᖏᓐᓂᒃ ᑕᕝᕙᓃᖃᑕᐅᓪᓗᑎᒃ ᓴᓇᐅᒐᓕᐅᕐᕕᖕᒥ ᐱᐅᒻᒪᕆᒃᑐᖅ ᐊᒻᒪᓗ ᓄᓇᖃᖃᑕᐅᓚᐅᖅᓯᒪᓪᓗᖓ 2018− ᖑᑎᓪᓗᒍ, ᐅᕙᓐᓄᑦ ᐱᒻᒪᕆᐊᓘᕗᖅ. ᐱᒻᒪᕆᐅᓚᐅᖅᓯᒪᕗᖅ ᓴᓇᖃᑎᖃᖅᐸᒃᖢᖓ ᓴᓇᐅᖓᓕᐅᖅᑎᓂᒃ ᑕᕝᕙᓂ ᖃᒪᓂᑦᑐᐊᕐᒥᑦ.
ᐊᑭᓐᓇᒥᐅᑕᓕᐅᖃᑦᑕᓚᐅᕆᕗᒍᑦ ᐊᒻᒪᓗ ᑎᑎᕋᐅᔭᖅᓯᒪᔪᓂᒃ ᐅᓄᖅᑐᓕᐅᖅᐸᒃᖢᑕ. ᐃᓕᓐᓂᐊᖃᑕᐅᑦᑎᐊᓚᐅᖅᓯᒪᕗᖓ. ᓴᓇᖃᑕᐅᖃᑦᑕᓚᐅᖅᓯᒪᒋᕗᖓ ᐅᔭᖅᑲᓂᒃ ᑎᑎᕋᐅᔭᖅᓯᒪᔪᓂᒃ ᐅᓄᖅᑐᓕᐅᖅᐸᒃᖢᖓ−ᓯᕗᓪᓕᖅᐹᒥᑦ ᓄᓇᓕᖕᒧᐊᕈᑎᒋᓚᐅᖅᓯᒪᔭᕋ ᓲᕐᓗ ᑎᑎᕋᐅᔭᖅᑎᓂᒃ ᓴᓇᖃᑎᖃᖅᖢᖓ. ᐱᐅᒻᒪᕆᒃᑐᖅ ᐊᒻᒪᓗ ᐅᐱᒋᔭᐅᒻᒪᕆᒃᖢᖓ ᑕᐃᒪᓐᓇ ᓴᓇᖃᑕᐅᕙᒃᖢᖓ ᑕᕝᕙᓂ ᐃᒡᓗᒥᑦ ᐊᒻᒪᓗ ᓄᓇᓕᖕᒥᐅᓂᑦ. ᐱᐅᒋᒻᒪᕆᓚᐅᖅᓯᒪᔭᕋ. ᐊᐅᓪᓚᖅᑎᓪᓗᖓ ᐃᓄᐃᑦ ᑕᐃᑲᓂᕐᒥᐅᑕᑦ ᖃᒪᓂᑦᑐᐊᕐᒥᑦ ᐱᕚᓪᓕᒻᒪᕆᓚᐅᖅᓯᒪᔪᑦ ᓴᓇᔭᒥᓂᒃ.