全球蝦蟹晒冷!

任食鮑參花膠

Weekend Weekly - - ICHIBAN -

聖誕正日食自助餐,人頭費起碼要成千蚊,當然期望是有質素的大魚大肉!金鐘JW萬豪酒店的自助餐一直不乏捧場客,餐廳甚少宣傳但也幾乎日日爆場,聖誕佳節期間,沒有特別主題,但有一連串矜貴海鮮和中菜,款式少見。海鮮一向是大家衝自助餐的頭號目標,這裡一共有6款,全球海鮮晒冷!網羅日本皇帝蟹腳、中國花蟹、加拿大麵包蟹、越南大虎蝦、波士頓龍蝦和本地龍蝦,非常揼本,自助餐少見,啱晒好蝦蟹的朋友!海鮮已吃撐了?冷靜啲!熱食區都未出招,肉類五花八門,充滿聖誕氣氛的威靈頓牛柳,工序繁多,牛柳煎香、栗子和雜菌炒香後分別雪過夜,酥皮包著巴馬火腿、雜菌和牛柳再捲起焗香,坊間起碼七百元一客,這裡吃一件都回本啦!另外還有燒火雞、M5和牛肉眼扒、香草燒羊架、片皮鴨等切肉,你以為我講完?仲有鮑參肚!南美花膠扒、南非鮑魚和加拿大海參,全部密密Refill任你食,用料新鮮,簡單蒸焗再配上蠔油茨已足夠。行到甜品區,都會被密密出爐的芝士撻香味吸引住,咬開脆身的牛油撻皮,香濃熱辣的流心芝士漿已經急著湧出來,小心辣嘴!還有抹茶紅豆車輪餅,師傅也在爐邊密密製作,甘香抹茶車輪餅包著紅豆粒,微甜飽肚,食一個夠啦,同場也有聖誕主題甜品和H agen-Daz雪糕近廿款糕餅,選擇豐富,呢張金牛,抵畀!

自助晚餐供應時間及收費 12月1-23日、27-30日:6pm-10pm星期一至四成人$768、小童$538,星期五至日成人$818、小童$578 12月24日:首輪(5:45pm-8pm)、次輪(8:30pm-10:30pm)成人$1,188、小童$788 12月25日:首輪(5:45pm-8pm)、次輪( 8:30pm-10:30pm)成人$1,058、小童$748 12月26日:6pm-10pm成人$828、小童$588 12月31日:首輪(5:45pm-8:15pm)成人$1,018、小童$718;次輪(8:45pm-11:30pm)成人$1,258、小童$888 2019年1月1日:6pm-10pm成人$758、小童$538 JW咖啡室 地址:金鐘道88號太古廣場香港JW萬豪酒店5樓 電話:2810 8366備註:①以指定恆生、匯豐、DBS、中銀信用卡惠顧晚市自助餐,2至5位可享9折優惠、6至10位可享85折優 惠(優惠不適用於12月24至26日及31日),詳情請向餐廳查詢。②設加一,收信用卡。

片皮鴨片皮鴨用上大隻多肉、油脂適中的北京鴨,塗上麥芽糖吹乾才炸香,外皮鬆化卻不會太肥膩,配以青瓜、大葱和乳豬醬捲著同吃,會貪心想食多件!

威靈頓牛柳聖誕期間限定菜式,酥皮香隔幾尺都聞到,最正是件件厚切,牛味濃郁、酥皮香脆,記得配以野菌汁同吃,濃郁可口。

燒火雞火雞重16-20磅,用香草、黑胡椒等醃製,再用慢火焗香,雞肉滑嫩,應節一流。

Newspapers in Chinese (Traditional)

Newspapers from China

© PressReader. All rights reserved.