Gadreva na Ovisa na veivuke ni lotu
Vunautaki na nodra kucuvi tiko vakalevu na marama kei ira na gone yalewa ena loma ni vale, vata kei na kena laukana tiko na mariwana kei na wainimate na ‘Ice’.
Era a vulagi sureti e na Bose Ko Viti e na siga Lotulevu, nai ka 23 ni Okosita, na iLiuliu Levu ni Tabacakacaka ni Ovisa e na noda vanua, o Brigadier-General Sitiveni Qiliho.
E a la’ki vakaitavi talega na nona ivukevuke o Turaga ni Ovisa Rusiate Tudravu. E marautaka vakalevu na veisureti o Qiliho.
E na nona vosa kivei ira na lewe ni Koniferedi o Brigadier-General Qiliho, e a vakavinavinakataki ira e na nodra dau veimasulaki me baleta na Tabacakacaka ni Ovisa kei na tavi era qarava na lewena.
Sa levu sara na veimataqali cala, e tukuna o Qiliho, ka sa yaco tiko e na noda vanua. E rua na cala bibi e yaco tiko ka kauwai sara kina vakalevu na Tabacakacaka ni Ovisa, na nodra vakasagai na marama kei ira na gone, kei na wainimate ni veivakamatenitaki na mariwana ,kei na dua na ka vou ka yacana tiko na ‘Ice’.
Sa kerea na lotu na Turaga ni Ovisa Levu na kena vunautaki na leqa e na kauta mai na mariwana kei na ‘ice’ vei ira na lewena.
O Tudravu, e vosa vakabibi e na nodra vakasagai na marama kei ira na gone. Na cala erua oqo e tukuna o Tudravu, ni levu na gauna e yaco sara tikoga e na loma ni vale. Na gone lailai duadua e beitaki ni vakasagai e yabaki rua ka beitaki ni vakasagai koya e dua na turaga e sa yabaki 67. Na gone lailai ka beitaki ni kucuvi e yabaki tolu ka beitaki ni kucuvi koya na tuakana dina ka sa yabaki 72. Na marama qase duadua e beitaki ni kucuvi e yabaki 62, e tukuna talega o Tudravu. Me yacova tiko mai oqo, e vakamatatataka o Turaga ni Ovisa, ni levu na cala me baleti ira na marama kei na gone, e vakayacori sara tikoga ena loma ni vale, na vanua ka dodonu me ra taqomaki kina. “Na Lotu Wesele, ni levu na kena ivavakoso, e na rawa ni veivuke, e na kena vunautaki ni cala na nodra vakasagai na gone kei ira na marama. Me liutaka nai valu oqo na Lotu Wesele, era na qai muria yani ko ira na veimata lotu tale eso,” e tukuna Turaga ni Ovisa Tudravu. Na mariwana e tukuna ni sa tetevi Viti na kena itei kei na kena vakayagataki.
E talanoataka na nodra cavu mariwana mai Kadavu na Ovisa e na dua na Sigatabu. Ni ra sa colata mai na vuni mariwana na Ovisa, e tukuna ni ra muri takosova na lomani koro, volekata e dua na valenilotu. E na gauna sara ga era donuya kina na valenilotu, e tukuna o Tudravu, era sa qai lagata na lewe ni sere na sere – Me bulabula mai, na were ni Kalou.
Na sere oqo e vakaibalabaletaki na kena sa cavu mai na mariwana, ka ra tea tu na cauravou e na koro ko ya, e tukuna o Tudravu. Eratou a tarogi kina na ovisa se cava na vuna eratou cavucavu kina e na Sigatabu. A kena isau ni cala vakalawa na kena tei tu na mariwana.
“E sega ni dua na siga e na vakatabui kina na nona qarai e dua na ka e cala tiko vakalawa, me vaka na tei mariwana,” e tukuna o Tudravu.