Tauyavu Na Kabani Me Veivuke I Vanua
Sa tauyavutaki na kabani ni bisinisi ni tikina o Totoya mai Lau ka sa yacana na Totoya Holdings Limited. E vakadeitaka mai oqo ki na Siga Vou na nodra gusu ni vosa na veituraga mai Totoya kei Vanuavatu o Jokini Taoi. Na yanuyanu o Vanuavatu e wili kina tikina o Totoya
O Taoi e tukuna ni nona itutu vakavanua na Mata ki Totoya, ka nodra vunivola talega na bose ni turaga ni tikina, ka sa soli talega vua na kaukauwa me gusudra na turaga ni tikina, e na veika era gadreva me vakadewataki. Na vakasama ni kena tauyavutaki na bisinisi ni tikina, e tukuna o Taoi ni a tekivutaki mai na yabaki sa oti e na kumuni soli kina Adi Natuicake 2017.
E na Vakaraubuka kei na Vakarauwai sa oti e tukuna oTaoi, ni sa qai matai ni soqo e na kena kumuni e dua na ilavo me vakatabakidua saraga kina Totoya Holdings Limited.
“Sa dua na ka na nodra solia na nodra dina na lewe ni vanua o Totoya kei Vanuavatu era sa tu e Viti Levu, ka vakaukauwataka talega na veiwekani na soqo siga rua oqo,” e tukuna o Taoi.
Na vu ni kena tauyavutaki na kabani ni tikina, e kuria me vukei ira saraga na tu e mai dela ni yavu. “Sa levu vei ira na matavuvale era sa biu vanua mai mera mai qaravi vuli e Viti Levu, ia na kabani oqo sa na vukea na nodra na tawana tiko ga na dela yavu,” e tukuna o Taoi
Na kabani, e tukuna o Taoi e sa na volia kece na nodra ivoli mai wai ka vaka kina e vanua. E levu mai na koro era dau mai vakaqara makete me volia na nodra ivoli ni ra yaco mai ki Viti Levu.
E vanua, e tukuna o Taoi, e wili kina na nodra cakacaka ni liga na marama kei na turaga, kei na veika e rawa mai wai e wili kina na sasalu e na kena veimataqali kei na ika taucoko.
Ni volia na kabani na nodra ivoli, era sa na rawa ilavo ka vukea na nodra bula e na veisiga, kei na nodra qaravi na gonevuli e Viti Levu.
Na kabani e tukuna o Taoi sa na qai volitaka na ivoli kina makete e valagi. E na dua tale na kumuni lavo me baleta na kabani e na yabaki ka tu mai.
Na takete e na yabaki oqo eratou a lavaka na komiti e $100,000 ia e a soqoni rawa ga e $82,515.
A dolava na soqo ko iratou na veiwekani mai Mualevu, Vanuabalavu, e na ilavo levu e $41,474. Me baleta na lauqa levu e tara tiko na noda vanua, e tukuna Taoi ni ra sa vakila tiko.
Era marau vakalevu e dela ni yavu e na kena sa tau na uca e na mua ni macawa.
E tukuna na turaga na Roko Sau o Ratu Josefa Cinavilakeba, era sa vakavinavinaka taki ira na lewe ni tikina, e na nodra solia na nodra iyau me baleta na nodra kabani.