Maroroi e na iyaloyalo na veibuli vei Tui Labasa
Sa maroroya ka tabaka vakaiyaloyalo na veibuli vua na turaga na Tui Lasaba, o Ratu Jone Qomate, na Tabana ni Vosa kei na iTovo Vakaviti ni Tabacakacaka iTaukei.
Eratou sureti me ratou la’ki tabaka ka maroroya vakaiyaloyalo na itukutuku ni soqo vakaturaga oqo.
Na nodratou tauri iyaloyalo e tekivu mai ena veitabaki vakalotu, ena valenilotu ena koro vakaturaga o Nasekula. Na lotu e vakayacori ena va na kaloko ena mataka lailai.
E liutaka na lotu na turaga na iTalatala Qase ni iWasewase Macuata o Talatala Qase Atunaisa Lagilagi, ka ratou veitokoni kina na vo ni talatala ena Vanua o Labasa, Talatala Tevita Mau (Tabacakacaka Labasa), Talatala Aisea Kaitu, Talatala Atunaisa Suraki, kei Talatala Inia Mavai.
Ena ivola tukutuku ni veibuli eratou tukuna nira qarava na veibuli vakavanua na Turaga Tui Macuata, o Ratu Wiliame Katonivere. Ni voleka na siga ni soqo, sa vakarau na vanua o Caumatalevu, na itikotiko vakaturaga e Bolatagane, mera la’ki vagunuva ka bulia na Turaga Tui Labasa.
Era yaco yani na veimatayavusa, e Caumatalevu ka ratou cabe talega na Yavusa Matainubulevu kei Ligaulevu me vaka ni ra bati. E matalia na itovo ni yadra era matanataka ni ra bole se lau ena matadra na Tui Macuata ni bera ni ra qarava na nodra itavi vakabati. Era tokara na liku vasili drokadroka, boro damudamu na doka ni ucudra. Ena kena ivakamacala, era tukuna ni qori na roka ni nodra manumanu, na qiqi.
Ena 10 na kaloko ena mataka, a qaravi na veibuli vakavanua. Era cavuta na vosa ni veivakadeitaki na Turaga Tui Macuata, ni bera ni ra solia na bilo ni Vanua vei Ratu Jone. Ena nodra vosa, era vakadreta na bibi ni maroroi ni lotu kei na vakabauta ena loma ni vanua. Era tomana ena nodra tataunaka na veiqaravi ni matanitu kei ira na vakailesilesi era sa mai vakaitikotiko ena vanua, kei na kena maroroi na veimata tamata era bula veimaliwai vata. Era tinia na nodra vosa ena nodra vakadreta na bibi ni nodra lomani na lewenivanua kei na kena colati na ivua ni veiqaravi ena yalovinaka.
A tubera na kamunaga, na isoli se itautaunaki ni vanua na iTaukei Namara, o Ratu Peni Sokia, era cavuta na nodra vosa ni veivakadeitaki kina itikotiko vakaturaga na tikini VolaTabu, Roma 13:1,2,3: “Ni sa sega na turaga e tubu wale, mai vua ga na Kalou. O ira era sa turaga tu, vakavuna na Kalou.” Era cauraka talega ena nodra vosa ni tubetube, na kena mai cabeti na itutu vakaturaga, e vakavuna na Kalou, me kua ni rere se taqaya. Era vakavinavinakataka na vanua, ni nanumi na nodra vakatabui vakalotu taumada, ni bera ni ra mai vakatikori vakavanua; era tinia na nodra vosa ena nodra tataunaka me lomani na vanua kei ira na lewena. Era tinia na nodra vosa ni tubetube, mera dau nanuma na itikotiko vakaturaga mai Bolatagane, ka ra lomani na veimata tamata kece sara.
Ni oti na veibuli vakavanua, era a solevu na lewenivanua o Labasa vua na Turaga Tui Macuata kei ira na nona leweni vuvale vanua.
Era binia na iyau ni vakavinavinaka, na ivono ni nodra mai bulia vakavanua na iLiuliu ni nodra vanua, ka ra vakabauta ni sa ivakatakilakila vinaka ni sa dei na vanua, ka sa na cabe vata na veisiga vinaka kei Labasa.
Nai itukutuku vakaiyaloyalo me baleta na veibuli sa na maroroi tu, ka sa na idusidusi tu e na veigauna sa bera mai me baleta na nodra buli na Turaga Tui Labasa.
E levu na veivanua, sa dredre na nodra vakumuna na itukutuku me baleta na isoqo vakavanua era vakaitavi kina. Ia, mai na vanua o Labasa, sa maroroi vakavinaka tu na veika mera muria ena nona buli na nodra iliuliu vakavanua.
Oqo sara ga e dua na nodratou itavi na Tabana ni Vosa kei na iTovo Vakaviti ni Tabacakacaka iTaukei.