Marautaki na Dolavi ni Valeniwai mai Koro

Era marau na lewenivanua o Koro ni sa dolava na nodra Valeniwai (Koro Maternal and Child Health Centre) ena siga Tusiti, na Mata ni Vanua o Ositerelia e Viti o John Feakes.

E a tiko talega e na soqo oqo na Minista ni Bula o Rosy Akbar. Na Valeniwai e vakacacana na cagilaba o Winston ena 2016. E dau yacana tu e liu na Nasau Health Centre. E solia na matanitu o Ositerelia na ilavo levu e $634,000 me vakavinakataki kina.

Ena nona vosa o Feakes kivei ira na lewenivanua, e vakavinavinataki ira e na nodra yaloqaqa kei na nodra veimaroroi e na gauna e liwa kina na cagilaba. Na matanitu o Ositerelia, e marautaka vakalevu na nona mai vukei ira na lewenivanua ni oti na cagilaba.

E dua na timi mai Ositerelia e a gole mai ki Viti me la’ki veivuke ki Koro ka wili kina na vuniwai, nasi kei na so tale na ivakalesilesi ni Tabana ni Bula mai kea. E vakavinavinakata na matanitu o Ositerelia o Minisita Akbar ena veivuke levu e cakava, me baleta na vakacaca ni cagi o Winston. Eratou na veiqaravi mai Koro e dua na vuniwai kei na tolu na nasi. Sa tiko talega e dua na rumu ni vakasucu ka sa na veivuke sara vakalevu vei ira na marama tiko bibi. E na dua na Bose ni Yasana o Lomaiviti ena yabaki sa oti, eratou a kerea kina mai Koro me sa dua na vale ni vakasucu ena yanuyanu. E vakalivalivtaki mai na sola na Valeniwai.

Na matanitu o Ositerelia e veivuke talega e na kena tara na Valeniwai e Kese mai Yasawa, vata kei Waimaro e Rakiraki.

Dau ni veitaba: Vale ni volavola ni Mata nei Ositerelia e Viti. Erau vakaitavi tiko oqo na Mata ni Matanitu o Ositerelia e Viti o John Feakes (katolu mai na yasana mawi) kei na Minista ni Bula o Rosy Akbar e na kena seleti na keke ka marautaki kina na dolavi ni Valeniwai mai Koro (Koro Maternal and Child Health Centre), vata kei na rua na lewenivanua mai Koro.