Me Qarauni Na Tukutuku Lasu Ena Vunau Vakapolitiki: PM
Era sa veivakasalataki na Turaga Paraiminisita o Voreqe Bainimarama, me qarauni na lasu ena vunau vakapolitiki mai vei ira na isoqosoqo vakapolitiki, ena nodra vakavakarau ki na veidigidigi ena ka 14 ni siga ni Vula o Noveba.
A vosa tiko na Turaga Paraiminista ena kena dolavi na vunau vakapolitiki ni soqosoqo na FijiFirst ena itikotiko ni lotu na Shree Gopal Sadhu Hanumaan Gadhi Mandir mai Nakasi ena siga Tusiti.
Na matanitu ka liutaka tiko ena gauna oqo, e tukuna ni sega kina na veilasutaki ia e tokona na dodonu kei na dina.
Eso ka ra a lewena tu na palimedi, e tukuna era curu yani ena lasu era cakava ena gauna ni nodra vunau ena veidigidigi sa oti.
Ko ira na isoqosoqo vakapolitiki era veiqati ena veidigidigi, era sa na vakarau na nodra lako wavoki ena nodra vunau, ia me qarauni na veika era na tukuna.
E veivakasalataki na Turaga Paraiminisita kivei ira na lewenivanua, ni tu vei ira na dododu mera tarogi ira na vunau wavoki tiko se na rawa vakacava na veika era tukuna tiko. Me kakua ni ra saga walega me rawati na veitokoni ia qo e tukuna na Turaga Paraiminisita e politiki duka.
Na matanitu na FijiFirst e vakadeitaka vei ira ni na tomana na nodra veiqaravi kevaka ena digitaki me veiliutaki tale.
Ko ira na lewe ni lotu oqo era veisureti e laki tavoci yani ki kea na vunau ni veidigidiig ni FijiFirst. Era loma dei ni na veiliutaki tale na Turaga Paraiminisita.
Eso ka ra gole sara mai Serea, Naitasiri, era tiko mera rogoca talega na kena tavoci na ivunau vakapolitiki e Nakasi.
Ni tarogi iratou na Siga Vou se ratou kila vakacava na soqo, e qai tukuna na nodratou gusu ni vosa o Joji Ramasima, ni ratou rogoca na kena itukutuku ni ratou cakacaka vakoro tiko e Serea.
“Keitou lako mai qo me keitou mai vakaraitaka na neitou veitokoni vua na Turaga Paraiminisita kei na Vunilawa (Attorney-General) o Aiyaz Sayed-Khaiyum kei na matanitu.” E tukuna ni ko ira mai Serea era tokona na matanitu na FijiFirst, ka ra gadreva me toso tale na nodratou veiliutaki.
E kuria ni nodra digidigi sa na gole ki na FijiFirst.
Sa ka ni veitalanoa e Serea, e tukuna o Ramasima, na vinaka ni veiliutaki nei Paraiminisita, kei na veivakatorocaketaki sa vakayacori e nakoro kei na yasana o Naitasiri. E vakaraitaka e dua na mata vakaturi, o Vinay Vikashi Lata, ni vinakata me tu ena veidigidigi baleta ni marautaka na veilutaki vinaka nei Bainimarama.
E tukuna o Paraiminisita Bainimarama e tukuna ni sega tu vei ira na veivakaduiduitaki, ka sega ni kune kivei ira na vei isoqosoqo vakapolitiki tale eso ena noda vanua. E marautaka talega vakalevu na veivuke sa vakayacori me vukea na bula yadua kei na matavuvale.
E yalataka o Lata ni na nodratou na qaqa na FijiFirst ka na veiliutaki tale na Turaga Paraimisita.