Gumatua na tei yaqona na itabagone e Nagonenicolo

Era sa tekivu me ra moce e veikau na itabagone ena tikina o Nagonenicolo e Naitasiri, ena nodra sa gumatuataka na nodra vakayagataki qele.

Na tikina o Nagonenicolo e tiko kina e walu na koro, ka wili kina o Nakorosule, Waibalavu, Nawaisomo, Wairuarua, Nasalia, Laselevu, Udu kei Burelevu.

Ena nodra bose na mata mai na veikoro e Nakorosule ena vula sa oti, era veivosakitaka kina e dua na nodra vakatutu me dua na vale ni bucibucini ni tei ni yaqona ena loma ni tikina.

Na mata ni tikina o Moave Driti e tukuna ni sa tiko na ituvatuva me baleta na nodra tei yaqoa na itabagone.

Sa tekivu tiko ka sa tiko na nodra kerekere mera vukei ena kena voli na kava, me laki dua kina na nodra vale ni vakacegu e veikau. Era gadreva mera sa tei yaqona ka moce e veikau ka mera qai lesu mai ki na koro ena Vakaraubuka. Na leqa era sotava tiko ena gauna qo e tukuna o Driti ni sega tiko na nodra itei.

Sa gole na kerekere ki na Tabacakacaka ni Teitei, ka sa tiko na veivosaki me sa mai vakawataki na itei ni yaqona ena dua na kena vale ena loma ni tikina.

E a tiko talega ena veivosaki qo nai Vukevuke ni Minisita o Joeli Cawakia ka tukuna ni leqa tiko na kasa ni yaqona mai vei ira mada ga ka ra tea tiko.

Na leqa oqo e kena iwali vinaka ga e tukuna o Cawaki me sa dua na vale ni bucibucini. Ena bose sa vakadonui kina na kena voli na kava ka laki tara na vale e veikau me sa tekivu na nodra laki moce e veikau na cauravou. Era sa gumatuataka na tei yaqona baleta ni vinaka na kena isau ka sa tu talega na kena makete.