TEI NA DOVU E NASAROWAQA MAI BUA
E rua na mataqali mai na yavusa Drakiniwai e Nasarowaqa, Bua, erau sa sainitaka e dua na veidinadinati kei na Kabani ni Suka ena noda vanua na Fiji Sugar Corporation (FSC), ena kena teivaki na dovu ena nodrau qele.
E levu na qele vinaka era tu ekea ka sega tu ni vakayagataki mai na yabaki 1980, ka sa nanuma na FSC me sa teivaki kina na dovu.
Na veidinadinati oqo e wili kina na vakarautaki ni qele ka teivaka na dovu na FSC, ia ena gauna sa volitaki kina na dovu, na kena tubu me qai wasei me 70 na pasede me taura na mataqali ka 30 na pasede na FSC.
E rauta ni 352 na eka ena vakayagataki ka sa 180 na eka sa tekivutaka na kabani na kena vakarautaki. Erau sa vakavinavinakataki na kabani na turaga ni mataqali erua, ena kena tavoci na veidinadinati qo ena Lotulevu nai ka 27 ni siga ni vula o Seviteba. E vakaraitaka na nodra gusu ni vosa o Ratu Josaia Tunaosara, na qele oqo ka sega tu ni vakayagataki mai na yabaki 1980. E tukuna ni levu na ituvatuva e nanumi me caka ena tiki ni qele lala, ia sega ga ni mani vakavotukanataki.
Na ivakalesilesi ni kabani e tiko ena kena tavoci na veidinadinati qo o Navin Chandra, e vakavinavinakataki iratou na iTaukei ni qele ena nodratou vakadinata na kabani ni suka.
E tukuna ni nodra sa mai cakacakavata kei na FSC e yaco tiko ena dua na gauna, e levu na veika vinaka sa vakayacora tiko na kabani, ka veitokoni tale tikoga kina na matanitu. >Maika Bolatiki