Your Siga Vou
Na vakadidike mai na tabana ni vosa kei na itovo vaka viti.
Evakasakiti na noda bula na iTaukei, ni matata ka bula vinaka tu na noda itovo vakavanua. Na itovo vakavanua cava e caka sa kilai sara tu vakamatata na nodra na marama kei na nodra na turaga.
E sega ni rawa me dua e laki siova yani e dua na ka e sega ni dodonu me cakava. Na veiqaravi vaka iTaukei e dau muria ga na itavi era vakaitavitaki kina na veimataqali ena loma ni yavusa se koro. E dua na cakacaka vakavanua era vakaitavi ga kina na Marama na ‘QALOWAQA’.
Ena veisau ni gauna eda sa donuya tiko ena gauna oqo, e sa vakarautaki talega na veiqaravi vakavanua me ganuta na veisau sa yaco tiko. Me vaka a qaloqawa edau vakayacori e matasawa ena nona sa qai udu yani na waqa e vodo tiko mai kina a vulagi dokai.
Ni wilika sara mada yani na nona vakadidike o Naomi Koroisamanunu mai na tabana ni Vosa kei na itovo VakaViti ena Tabacakacaka iTaukei.
Na Qalowaqa
Oqo na veikidavaki vakamarama e dau caka vua e dua na marama bale. E dau caka galugalu ga na veikidavaki vakamarama oqo. Ena gauna e liu, era dau vuto yani iwai na marama mera laki tavaka na waqa e vodo tiko mai kina na marama bale. E dua vei ira na marama e vuto tiko yani qo, ena lai sevuka na mua ni waqa e liu ena waitui qai kotora kina e dua na tabua.
E sa qai duabulu ga na qalowaqa e vakayacori e Viti. Qo na qalowaqa a caka vua na Raluve ni Bolatagane, o Princess Anne, ena 1974, era a sega ni vuto iwai na marama, era a veikidavaki ga ena raralevu e Suva. A tavo tu e dua na takia e rara, ra qai yaturua mai na marama mera tuva na matanivola na “Va, oya mera sota ena dua na muana, ra qai dodo veiyawaki. O rau na tu duadua mai liu, rau veiyawaki duadua. Era a tama vakamarama, “Mai na vakadu –u –ua.” Rau sa qai gole cake e rua na marama mai na boto ni tuvatuva, dua e kauta tiko mai na tabua, ka dua, na draunivia e tawa tiko kina na waitui. A qai sevuki na mua ni takia e liu ena waitui me vakatakarakarataka na kena dau sevuka na waitui na waqa, ni dau vakayacori na qalowaqa e liu mai waitui; sa qai kotori na tabua. Sa qai gole cake mai na matanivanua, taura na tabua mai na vanua e koto kina, a tubera cake vua na Marama Bale.
Ena gauna oqo era sa veiqaraqaravi tu na marama. O rau na botoisau, se o rau na tu sara mai na boto ni tuvatuva, rau sa qai tosocake mai vakamalua ra qai veitosotosoi na marama ena dua na ituvatuva vou, mera qarava cake mai na Marama Bale. Era dau kila vinaka na nodra dui tutu na marama kei na nodra dui ukuuku, me kua sara ni dua e tu cala se daramaka na iukuuku e sega ni veiganiti kaya. Kevaka e dua na marama e tokara cala tu e dua na iukuuku, me vakabeka na lawe, sa na rawa ni kovei se kaliraki tani mai vua na lawe, qai viritaki e ra. Na kaliraki tani ni ukuuku e itavi nei koya e vakatulewataka tiko na veiqaraqaravi.