Tokona O Cakaudrove Na Matanitu Digitaki
Sa solia na nona veitokoni na Matabose ni Yasana o Cakaudrove kina matanitu era sa digitaka na dau ni veidigitaki, me veiliutaki tale ena va na yabaki sa tu e matada.
E tukuna mai ki na Siga Vou na jemeni ni Bose ni Yasana o Ratu Jekesoni Yavala, ni matanitu na FijiFirst ka liutaka na Turaga Paraiminisita Voreqe Bainimarama sa vukei ira vakalevu na lewenivanua ka nuitaka ni na tosoya tale.
Na veivakatorocaketaki levu duadua e vakayacora na matanitu oqo e tukuna o Ratu Yavala, na kena vakadaberi na livaliva ka qaqi mai na wai ena delana ena koro o Somosomo, Taveuni. E tukuna ni ra sa oca na lewe ni koro e Somosomo na sauma na waiwai ni nodra idini ni cina. Ia ena gauna oqo e kuria e sa waqa na cina livaliva ena siga taucoko ka sau lailai talega. Na livaliva vata oqo e sa -dewa talega ki Wairiki.
Oqo e dua na veivakatorocaketaki era marautaka sara vakalevu ni sa vakayagataki na livaliva vakabibi, ni sega vei ira na matanitu e liu e tu na nodra ituvatuva me baleta na veivakalivalivataki e Taveuni.
E dua na ka era gadreva vakalevu e Taveuni e tukuna o Ratu Yavala, na kena vakavinakataki na gaunisala mai Wairiki ki Vuna kei na gaunisala mai Solesole ki Bouma.
Na Matabose ni Yasana e tukuna o Ratu Yavala esa vakarautaka tiko e vica na ka me na veivosaki kina kei na matanitu. E vakaraitaka ni dua na ka e vinaka kina na matanitu ni FijiFirst kei na kena veiliutaki, ni dau vakarorogo kivei ira na lewenivanua. Na Matabose ni Yasana e kuria ni gusudra na lewenivanua kina matanitu.
Sa oti na gauna e dau digitaki ga kina na vanua e gole kina na veivakatorocaketaki kina dua ga na iwase ni lewenivanua, baleta ni matanitu sa veiliutaki tale qo, e wasea vakatautauvata na veivakatorocaketaki kivei ira na lewenivanua kece sara.