Dola na koronivuli ni muri vuli e Makolei

Marau na gone lailai kei ira na nodra itubutubu.

Era sa marau na lewenikoro e Makolei ena tikina o Solevu mai Bua ni sa mai dola ena siga Vakaraubuka na nodra koronivuli na muri vuli (kindergarten).

E vakailavotaka o Ratu Qativi Roberts Cromb, edua na turaga ni Ositerelia ka vasu ki Nawaido, e dua na koro e volekati Makolei. Na turaga qo e taukena na vale ni culacula e Valelevu kei na Katalyst Foundation.

E vakaraitaka mai na gusu ni vosa e Makolei, o Mikaele Limo, ni dua na veivuke levu e sa vakayacora tiko na turaga oqo i Solevu kei Bua raraba. E dau kauwaitaki ira vakalevu na gone, e kuria o Limo. Na nodra koronvuili e Makolei e tukuna ni na vukei sara vakalevu o ira na gone lailai vata kei ira na nodra itubutubu.

Sa na rawarawa kina vei ira na itubutubu mera toka volekati ira na luvendra.

Ena kena dola na koronivuli era gole sara yani o ira ka ra cakacaka tiko ena vale ni culacula e Valelevu, mera laki tiko ka vakadinadinataka.

O Ratu Qativi e sa tara talega e Nawaido, na nona koro ni vasu, edua na koronivuli me baleti ira na gone, kei na kena valenikuro, vakatalega kina na nodra vale ni soqo.

Ena yabaki sa oti e cakacaka vata na Katalyst Foundation kei na Medical Services Pacific Outreach ena nodra sikovi eso na koro, wili kina o Banikea, Naviqiri, Nawailevu, Dama, Nasau kei Nagadoa, me laki vakadewataki vei ira na itukuutku ni tiko bulabula.

Na Katalyst Foundation e kauta na veisau ki na veivanua e veiqaravi kina.

E veivuke talega na Foundation ena soli ni desi kei na teveli ki na koronivuli na Immaculate Primary School e Nabau, Solevu.