Vakadeitaki na Siga ni Bose ni Yasana
Sa vakadeitaka mai na Tabacakacaka ni iTaukei na tiki ni siga ni Bose ni Yasana ki vei ira na yasana era se bera ni vakaotia na nodra bose ena yabaki 2018 ki na 2019.
E vakadeitaki mai ni laki kerea na jemeni ni Bose ni Yasana o Cakaudrove, o Ratu Jekesoni Yavala, me toso na nodratou bose baleta na sa mai leqa o Adi Ateca Ganilau, ka na bulu tiko ena sautabu mai Vuniduva, Somosomo, enai ka 28 ni Noveba.
Na Bose ni Yasana o Cakaudrove sa na vakayacori tiko mai nai ka 5 ni Tiseba ki nai ka 6.
Ena vakayacori na Bose ni Yasana o Serua e nai ka 5 ni Tiseba. Na Bose ni Yasana o Macuata ena vakayacori e nai ka 6 ni Tiseba. Na Bose ni Yasana o Lau ena qai vakayacori enai ka 7 ki nai ka 8 ni Veverueri na yabaki mai oqo. Ena vulagi doka kina na turaga Paraiminisita, o Voreqe Bainimarama. E vakaraitaka mai na Roko Tui Lau o Paula Delaivuna ni se toso tikoga na nodra vakavakarau mai Lakeba, dina ga ni sa mai toso na gauna ni bose.
Sa na qai vo tiko na tiki ni siga ni Bose ni Yasana o Naitasiri.
Ni oti kece na veibose oqo sa na qai oti kina na Bose ni Yasana ena yabaki vakailavo ni 2018 ki na 2019.
Na Matabose ni Yasana esa gusu ni lewenivanua ki na matanitu.
Ni se bera ni qaravi na Bose ni Yasana edau vakayacori eliu na Bose Vakoro ka qai tarava na
Bose ni Tikina. Na veimosoni ena bose erua qo esa dau kau cake me laki rogoci ena Bose ni Yasana ni bera ni vagolei ki na Tabacakacaka ni iTaukei ka me vakayacori talega kina na vakatulewa. Ke gadrevi me kau cake ki na matanitu, esa na qai kau ki na Minisitiri me laki raica na Minisita ka vakatulewa kina.
Era wili talega kina na veivale ni volavola ni yasana ka ra tiko talega na kena ivakalesilesi ka veiliutaki kina na Turaga Roko Tui.
Na vale ni volavola ni Bose ni Yasana e vakarorogo ki na vale ni volavola ni Talai Veivuke (Commissioner’s Office) ena iwasewase cava e tiko kina, ka nona iliuliu ni cakacakaka na Turaga na Talai Veivuke.
Ena vulagi dokai tiko o Paraiminisita Voreqe Bainimarama ena Bose ni Yasana o Lau mai Lakeba, ena ka 7 ki na 8 ni Veverueri, 2019.