Soli na ivakaro vei ira na itaukei ni Waqa
Eda sa yacova tiko na gauna ena veiyabaki me dau levu kina na veitosoyaki mai vei ira na lewenivanua.
E levu era dau vakayagataka na waqa mera gole kina ki na nodra yanuyanu mera laki marautaka kina na Siganisucu kei na yabaki vou.
Vei ira na tu ga e Viti Levu,era na dui gole talega ki na nodra soqo, ka ra na vodo basi.
Ena kauwaitaki ni levu ni veitosoyaki ena yaco tiko, era sa veivakasalataki na ovisa mera qaqarauni.
Vei ira na gole ki yanuyanu, sa veivakasalataki na Tabana ni Soko kivei ira na itaukei ni waqa, mera kakua ni vakausani ira vakaveitalia na pasidia. Na veiwaqa kece e sa tiko na kena iyalayala ni pasidia me vakavodoka, ka sa na sega ni rawa ni na sivia na pasidia era vakavodoka. Sa veivakasalataki o Captain Philip Hill, na iliuliu ni Tabana ni Soko, ni ratou na tiko ena wavu se dua na vanua e vakavodo kina e dua na waqa me ratou raica na levu ni pasidia e vakavodoki. Na veitosoyaki ena gauna vakaoqo, era dau vakarautaka mai ena loma ni dua na yabaki, ka sa kumuni na ivodovodo me saumi rawa kina na waqa.
Ia, na levu ni lako ena vakatau mai na levu ni pasidia e rawa ni vakavodoka na waqa ena veikau. Ko ira kece na waqa e dau vakatau mai na pasidia ena ilevu ni qaloqalo e tiko kina.
Ia kevaka edau gadrevi me so tale na pasidia, e dua na kena ivakarau me dau kerei ki na Tabacakacaka ni Soko, ia edau gadrevi me kau tale mai eso na iqaloqaolo me veirauti kei ira kece na pasidia vou.
Era sa vakaroti talega na itaukei ni waqa mera dau vakamuria vinaka na itukutuku ni draki. Ke sa soli na ivakaro ni draki ca, e sa dau soli talega na ivakaro kivei ira na waqa.
E sa soli talega nai vakaro kivei ira na itaukei ni waqa lalai ena veikorokoro, mera kakua ni vakausa pasidia vakaveitalia.