Matai ni bose ni Yasana ko Tailevu ena Me

Nai matai ni Bose ni Yasana ko Tailevu ena vakayacori tiko e Nausori ena vula ko Me. E vakadeitaka mai oqo na Roko Tui Tailevu o Mosese Nakoroi, ka sa qai taura nai lesilesi oqo ni oti na nona tiko mai Ra.

Na ka bibi ena bose oqo e tukuna o Nakoroi na kena na vakadonui nai tuvatuva ni lavo ni yasana ena 2019 - 2020.

E tukuna na RokoTui Tailevu ni ratou sa vakadonuya na komiti ni lavo, ka sa qai vo ko ira na lewe ni bose ni yasana. Ena ituvatuva ni bose ni yasana e vakarautaka na Tabacakacaka iTaukei, nai matai ni Bose ni Yasana ko Tailevu e dodonu me vakayacori ena vula o Veverueri mai nai ka 26 kina 28 ni siga mai Ucunivanua, Verata.

E tukuna na Roko Tui Tailevu ni sa mai veisautaki me ratou na qai qarava na bose ni yasana ena Noveba ko iratou mai Ucunivanua. Na vuna, e kuria, ni levu na ka eratou qarava tiko ena gauna oqo ka wili kina na nodratou wai.

Ena veitalanoa kei na turaganikoro mai Ucunivanua o Ratu Sevanaia Verata, e tukuna ni ratou sa vakarautaka tiko na bose ni yasana ena Evereli ka ratou na saga vakakauwa me sa na yaco kina na koro na wai.

Na wai e dau leqa e Ucunivanua ia eratou vakavinavinakataka na Turaga Paraiminista o Voreqe Bainimarama ena nodra veivuke me baleta na wai.

E tukuna o Ratu Sevanaia ni ra gole yani ena veibulu vua na Turaga na Ratu mai Verata o Ratu Ivereimi Ravoka ena vula o Me ena 2015, ka ra vakadinadinataka na leqa ni wai e Ucunivanua.

Na wai e tukuna ni sa voleka sara kina koro ka dodonu me oti na kena cakacaka ena vula ko Me.