Taleitaka o Rokotunidau na veisiko nei Ratu Nailatikau
EDAU gauna namaki tu vei Saimoni Rokotunidau na gauna ni siga ni sucu kei na tawase ni yabaki ka ni rua na gauna qori e dau sikovi yani o koya e na nona curu voli e na vanua ni veivakarautaki e Naboro.
Taleva lesu tiko na nona bula voli vakavesu o Rokotunidau ka vakaraitaka na nona vakavinavinaka ki vua na Sipika ni Palimedi o Ratu Epeli Nailatikau e na nona dau vakayaloqaqataki koya voli dina ni sega ni ra dau talevi koya na wekana.
E dua vei ratou na lewe vitu na wekada ka tauri tiko vakavesu o Rokotunidau ka ratou mai vakaraitaki cakacaka ni liga e na otela na Grand Pacific Hotel e Suva. E wasea tiko kina o Rokotunidau na nona dau talevi koya yani ko Ratu Nailatikau ka vakatekivu mai na yabaki 2009 e na gauna a se Peresitedi kina ni noda vanua.
E taleitaki ni da rogoca na nona i talanoa ni kauta mai na luluvu ni da vakasamataka na bula galili ni tu vakavesu ia e tucake ko Rokotunidau ka vakavinavinakataka na nona kauwai na Turaga na Sipika.
“Ira dau tukituki, dola yani noqu rumu qai
dau vakabula vei au. Lululu, dau tarogi au, sa vo e vica, e qai dau vakasalataki au meu vakaukauwa tiko.”
“E va toka qori e na loma ni lima ki na ono na yabaki ka sa dua na gauna talei nodra dau gole yani na Turaga ni sai koya duadua ga e bau dau lai sikovi au voli.”
“Ni keirau mai sota tale e na bogi e daidai sa dua na ka na noqu marau ka ni sa qai bau rawa ki vi au me’u vakaraitaka ki vua na noqu dau marautaka na nona dau gole yani,” e kaya ko Rokotunidau.
Mai vo toka qo vei Rokotunidau e 2 na macawa me sere mai na vanua ni veivakarautaki
e Korovou ni oti na nona qarava na 12 na yabaki na totogi ka tau vei koya.
Mai vakavotukana na nona taledi ka bau okati toka na cauravou qo me dua na kena dau e na droini.
E na nodra vosa na Turaga na Sipika, e vakaraitaka kina ni taledi e tiko vei ratou na cauravou e sa dua na sala e veisau taki kina na nodratou bula ka sa dua tale ga na sala tale ki na nodrau veiwekani vinaka kei ira na lewe ni vanua.
“Na cakacaka qo na droini e vukea tale ga na kena vakacegui na nomuni vakasama ka laveti cake tale ga kina na nomuni vakarau
ni raica na bula raraba.”
“Sega wale ga ni koya ya ka ni vukei ira tale ga na nomuni i caba me i dusidusi ki vei ra ka veivuke sara vakalevu e na veisau taki ni bula me yaco me dua na bula yaga mai muri.”
“Au vakavinavinaka taka tale ga na rai yawa ni Tabana ni Veivakadodonu taki e na kau mai ki tuba na vei ka e so e dau laurai ga mai na Tagimoucia Gallery e Korovou ka sa tiki tiko ni nodra vukea na wekada e ra tauri tiko vaka vesu e na ruku ni tuvatuva ni ‘Reveni Dromodromo,” e kaya ko Ratu Nailatikau.