‘Mo yalo dei ena gauna ni leqa: Daivalu
Evaka toka o Sireli Daivalu, na cauravou ni koro o Waicoka e Tailevu, ni bau kalougata ni tiko rawa e na dua na vuli siga tolu ni veiqaravi taumada ki vei ira na vakaleqai (First Aid) ka a vakayacori ena vale ni soqo vakoro e Nausori.
E rauta ni lewe 40 na tabagone e na yasana o Rewa kei Tailevu era tiko rawa ka matataka mai na soqosoqo ni tabagone e Waicoka o Daivalu.
Vakaraitaka o koya ni qo e dua na vuli yaga sara ka sa dodonu me vakatetei yani kina vei soqosoqo ni tabagone e so.
“Sa yaga sara na vuli qo ni solia vei au na yalo dei meu na vakaraitaka kina na noqu kila ke vaka au donuya e dua na vakacalaka e vanua se e wai. E vuqa na gauna ni da sotava na vakacalaka, e dau yaco sara kina me kau tani na nodra bula o ira e ra vakaleqai me vaka ni sega tu na kila ni veiqaravi taumada vei keda sara ga na tu e yasadra. E dina ni siga tolu ga ia sa levu sara na ka keimami bau mai vulica kina ka sa solia tale ga e dua na kila vou,: e kaya ko Daivalu.
“Au vakavinavinaka kina ni sa dua na kila vou sa mai toka qo ki vei au,” tomana ko Daivalu.
E kaya o koya ni dua na itatao levu tale ga sai koya na noda veirokorokovi vakaveiwekani kei na vei vakatatabu e so ka vu mai ena lotu e da lewena, ia e sa dodonu me da biuta vakatikitiki na veika kece oya ni dau yaco na vakacalaka se leqa ka me na liu taumada ga na veiqaravi ni bula.
“Sa ka bibi kina mo na yalo dei tiko e na veigauna kece sara. Au sa tu vakarau tale ga me’u na lai tuberi ira na noqu i tokani e na koro ka me ra na bau kila tale ga na veika e sa mai vulici qo,” e kaya ko Daivalu.
E na nona mai sogota na vuli na Minisita ni Tabagone kei na Qito o Pareveen Kumar e kaya kina sa i tavi ni matanitu me vakadeuca yani na vuli vaka oqo ki vei ira na tabagone ka sa sala vata na vakanuinui ni ra na lai vakadewa taka na veika e vulici ki vei ira na nodra i caba.
“Na Tabacakacaka ni Gone kei na Qito e sa biuta vata tu na vei porokaramu ni vuli e so mo ni tuberi kina na i tabagone ka me na vukei kemuni, ka vakaiyaragi taki kemuni e na vei kila e so me na vukea na nomuni tubu kei na kena cadra cake mai e dua na Viti vou,” vakaraitaka ko Minista Kumar