CAU VAKALEVU KO NADROGA E NA VEIVAKATOROCAKETAKI
Sa bau dua na vanua vinaka sa tu kina qo o Viti. Qori na vosa e cavuta na noda iLiuliu ni Matanitu ka noda Paraiminisita o Josaia Voreqe Bainimarama e na nona lai dolava na bose ni yasana ko Nadroga kei Navosa e na siga Vukelulu na ika5 ni siga ni vula ko Me ka vakayacori e na koro o Nasigatoka.
E na nodra vosa vei ira na lewe ni bose e ra kaya kina ni vanua totoka na nodra yasana ka sa cau vakalevu sara e na veivakatorocaketaki e na noda vanua.
“Niu raica na Yasana o Nadroga-Navosa, au vaka-samataka na vei-vaka-torocake-taki lelevu eda sa qarava vata ena loma ni Yasana ka’u sa raica rawa talega na levu ni vei-vakatorocake-taki e rawa ni vakayacori ena loma ni Yasana,” e ra kaya na turaga na Paraiminisita.
Me tekivu mai na 2014 me yacova mai na yabaki sa oti, na Matanitu sa vakayagataka e voleka sara ni 75 na Milioni na Dola ena loma ni yasana. E dua na kena iwase levu a vakayagataki me vaka-torocake-taki kina o Navosa.
E vakayagataki e 38 na Milioni na Dola ena Tabana ni Bula.
Mai na ilavo oqo, e 30 na Milioni na Dola e vakayagataki me tara kina na Valenibula e Keiyasi ka qaravi Noikoro, Nasikawa, Namataku, Bemana, Naqalimare, Navatusila kei Nasivikoso e Ba.
E $13,485,200 ena ta sala ka vakayagataki e $5,091,620 ena vakadrodroi ni wainigunu. E vakayagataki e $4,146,966 ena veivakalivalivataki kei na solar ena taudaku ni veikoro lelevu. E vakayagataki talega e $1,589,442 ena tosoi ni vei- vakalivaliva-taki e Wauosi, Nasivikoso kei Tau.
“Keitou na tomana tikoga na kena sega ni saumi na vuli, na kena isau vakailavo ena dua na yabaki e 60 na Milioni na Dola. Keitou vakayagataka talega e $3,708,509 me tara kina e dua na yasa ni Sigatoka Methodist Secondary School, na vale ni qasenivuli e St.Theresa Li-si-ya (Lisieux), na Ratu Lalabalavu Secondary School mai Malolo kei na Vatutoko Bainimarama Primary School,” e ra tomana na Liuliu ni Matanitu.
Ra vakaraitaka vei ira na lewe ni bose ni rawa ni dua na siga taucoko na nodra tasereka yani na vei-vakatorocake- taki ni matanitu ena vanua o Nadroga kei Navosa.
“Me vaka ga au vakaraitaka mai Serua, Namosi kei Cakaudrove, au sa nanamaki tu ena veigauna mai muri, “na cava na icavukalawa tarava” kina vanua o Nadroga/Navosa kei na noda vanua.”