‘Meda Vakayagataka Vinaka sara na Veivuke ni Matanitu’

Kerei keda tiko na lewenivanua o Velemani Latilevu meda kakua ni wele ka meda taura ka vakayagataka vinaka sara na veivuke e solia tiko mai na Matanitu. Ia, mai na veivuke levu ni Matanitu me baleta na ‘Free Education’, e kaya o Latilevu era sa toso na go

O Latilevu e Mata ni Tikina o Nokonoko, ena yasana o Nadroga ka vabibitaka tiko me sa rauta na vakaulubale, ka sa dodonu meda cakacakataki keda.

Esa vula tolu nikua nona mai taura na itutu ni Mata ni Tikina o Latilevu, ia ena siga Vukelulu e matai ni gauna me lai tiko kina ena Bose ni Yasana o Nadroga kei Navosa, ka lai dolava na iliuliu ni matanitu na Paraiminisita o Voreqe Bainimarama, ka vakayacori ena koro o Nahigatoka ena macawa oqo.

Tukuna o Latilevu, ni sega vakadua ni mataboko se vakasuka na Matanitu ena nona rogoca na tagi ni lewenivanua ka qaravi ira vakatautauvata.

“E sega ni vakatabakidua ga na matanitu ena dua ga na vanua, e tara raraba na veitabana kece ni veiqaravi ka kauta vakavoleka ena taudaku ni vei koro lelevu,” e tukuna o Latilevu.

VULI

E kaya ni dua na rai vinaka e kauta mai na matanitu na FijiFirst, sa ikoya na veivakatorocaketaki ena vuli (Free Education).

Ena gauna e liu, e kaya e dau dredre vei ira na itubutubu na vakauti ira na luvedra i koronivuli baleta na dredre e sotavi ena kena dau vaqarai nai icurucuru ni vuli.

“Nikua, esa sega ni yaga meda vakaulubale, baleta esa saumi na icurucuru ni vuli me tekivu mai ena sova ni vuli me yacova na fomu vitu.”

Tomana ko Latilevu ni sa nodra itavi na itubutubu kei ira na dauniveisusu mera solia tiko nai vakasala vinaka vei ira na luvedra mera qacoya sara vakaukauwa na vuli me rawa ni ra tamata yaga mai muri.

“Esa dodonu meda solia taucoko noda veitokoni vei ira na luveda, baleta sa ira oqo na sausauvou kei Viti ni mataka.”

E liu e kaya o Latilevu na loma ni tikina o Nokonoko e dau bera tu ena rawa ka vaka vuli.

Ia, mai na veivuke levu ni matanitu me baleta na ‘Free Education’, e kaya o Latilevu era sa toso na gone ni tikina ena kena vakayagataki vinaka na veivuke levu oqo, ka levu era sa dewa ena vuli torocake ka ra sa cakacaka vinaka tu nikua.

E kaya e levu tale na veivuke esa vakayacora tiko na Matanitu sai koya na kena kauwaitaki sara vakalevu na bula ni vuvale.

Tomana ka kaya oqo na veika era sega ni vakayacora na vei matanitu sa oti yani, ka sa dodonu meda vakavinavinaka kina ka vakayagataka vinaka.

E vosa tiko oqori na Mata ni Tikina o Nokonoko, Velemani Latilevu ena Bose ni Yasana o Nadroga kei Navosa ka vakaycori ena koro o Nahigatoka ena siga Vukelulu.

Na turaga na Paraiminisita Voreqe Bainimarama, o ira na vakalesilesi va matanitu kei ira na mata ni tikina ni oti na nona dolava na Bose ni Yasana o Nadroga kei Navosa ena siga Vukelulu.

SUVA. LUSIANA TUIMAISALA,