Vakamatatataki na Veika me ra Vakarautaka na Mata
Sa tekivu na nodra vunau na mata mai nai soqosoqo vakapolitiki na Social Democratic Liberal Party (SODELPA) ka sa kacivaki na yacadra.
Eso era sa lutu mai na People’s Alliance Party (PAP) e tukuna era sa via mai tu ena SODELPA, ia e tukuna o Duru, era na kauta ga mai na ririko kina isoqosoqo.
E vakadeitaka na vunivola ni SODELPA o Lenaitasi Duru ni ko ira sa kacivaki na yacadra mera na solia kina isoqosoqo e $3000.
Mai nai lavo oqo e $1000 me na soli kina valenivolavola ni veidigidigi (Elections Office) kei na $2000 ena vakayagataka nai soqosoqo ena kena vakarautaki na veika mera na kauta kina veivanua era na laki vunau kina.
Sa vakadeitaka ni sa vakarau oti ka tabaki na nodratou yavu (manifesto) ni veidigidigi.
Ko iratou na lewe 28 ka sa kacivaki oti na yacadratou e tukuna ni ra na tiko ena dua na vuli siga dua ka na vakayacori ena Moniti mai oqo nai ka 13 ni Me ka sa soli talega vei ira na yavu ni veidigidigi.
Vei ira na lewe 28 e tukuna o Duru ni lewe va era lewena tiko na palimedi ena gauna oqo, lewe va tale eratou sa lewena oti na palimedi, ka ra vuli Vinaka taucoko na kena vo.
Mera nanuma tiko e vakarota kivei ira na mata sa kacivaki oti na yacadra ni sega ni ra na vakadeitaki me yacova ni ra sauma na nodra $3000.
Era sa kila kece tiko ka levu vei ira era sa tekivu sauma mai na ilavo lavaki oqo.
Na nodra vunau era na dui sauma ka oqo ena wili ga kina na nodra ivodovodo kei na nodra isevusevu. Sa tiko na vakabauta ena loma ni soqosoqo ni ratou sa na rawata na qaqa ena veidigidigi oqo.
E tukuna ni na vo ni lewe 23 tale na yaca ena qai kacivaki ni cava na bose ni palimedi ena yabaki qo.
Eso era sa lutu mai na People’s Alliance Party (PAP) e tukuna era sa via mai tu ena SODELPA, ia e tukuna o Duru, era na kauta ga mai na ririko kina isoqosoqo.
“Ko ira oqo era sega ni vakadeitaki ira rawa tu mada ga ka na sega ni mai via leqa kina na isoqosoqo.”
Na vunau vakapolitiki era na vakaitavi sara ga kina na mata digitaki ka sa na tiko vei ira na veitokoni ni soqosoqo levu.
ENA QAI TOMANI TALE YANI ENA MACAWA KA TU MAI