Dewa kina Politiki ko Baleilevuka
Na mata vakaturi ni soqosoqo vakapolitiki na People’s Alliance Party (PAP) o Mereseini Baleilevuka e tukuna mai Nadi ni vakarau kacivaki na yacana ni sa kena gauna donu vua me sa toso.
E qasenivuli ena yasayasa vaka Ra ena loma ni 20 na yabaki ka vakacegu ena 2005 me vukea na kena tauyavutaki na Free Bird Institute Limited (FBL) mai Nadi ka lewena talega na kena matabose e cake.
Ni oti e 18 na yabaki ena FBL e vakaraitaka o Baleilevuka ni sa toso ka sa lewena na PAP.
Ko Baleilevuka e tukuna ni lewena na PAP, baleta ni veiliutaki tiko kina na Paraiminisita vakacegu ni noda vanua o Sitiveni Rabuka, ka sa qarava e levu na ka, me vaka ni tiko talega vua na kila ni veiliutaki.
E marautaka o koya na veiliutaki nei Rabuka ni sega ni dua e guilecavi, ka tu vakarau talega me na veiqaravi vei ira na lewenivanua taucoko.
Na PAP, e vakabauta o Baleilevuka ni na kauta mai na veisau era vinakata tiko na lewenivanua ena gauna oqo ka vakabibi na kawa iTaukei.
E vakavinavinakataki Rabuka ena nona veivakabauti me dua vei ira na lewe 12 na mata vakaturi ka kacivaki mai Nadi e nai ka 9 ni Me.
Ko Baleilevuka e cavutu mai na koro o Uruone, Vanubalavu ka vasu ki na koro o Tubou, Lakeba, Lau.
Na Free Bird Institute Limited e koronivuli ni vuli vosa vakavalagi vei ira mai Esia kei na so tale na matanitu mai vanuatani ka ra tiko e Viti.
E na vuli torocake ea lako kina o Baleilevuka kina University of the South Pacific (USP) ka rawata kina na nona ivola koroi na Bachelor of Arts ka vakatabakidua kina Vuli (Education) kei na vosa vakavalagi (English Language/ Literature).
Me vaka ga na kena ivakarau, sa na kerea na nona vakacegu mai na FBL me sa qarava vakatabakidua na nona saga me lewena na palimedi ke levu era digitaki koya.
ENA QAI TOMANI TALE YANI ENA MACAWA KA TU MAI