Gadrevi mera Veidigidigi Kece na Lewe ni Lotu
Sa solia na nona ivakasala na turaga na Qase Levu ni Lotu Wesele e Viti kei Rotuma o Talatala, Ili Vunisuwai kivei ira na lewe ni Lotu ni sa dodonu mera na veidigidigi
E vakadeitaka mai oqo kina Siga Rarama na iliuliu ni tabana ni tukutuku ni lotu o Talatala Wilfred Regunamada.
E kaya ni sa tu ga na lawa ni lotu me baleta na politiki.
Kivei ira nai talatala era via tu ena veidigidigi e tukuna ni dodonu mera kerea na nodra vakacegu ia e vakadeitaka mai ni sega ni dua nai talatala ena tu ena veidigidigi ena yabaki qo.
Na valenisoqo ni lotu e tukuna ni dolavi tu kina veisoqosoqo vakapolitiki mera vunau kina ia me kerei vua nai talatala e veiqaravi tiko kina.
E matata vinaka tiko ni lotu e sega ni tokona e dua nai soqosoqo vakapolitiki ia ko ira na lewena sa soli tu vei ira na galala mera lewena ka tokona e dua nai soqosoqo.
Na kena vunautaki na politiki vei ira na dauvunau e loma ni vale ni lotu e vakatabui talega.
Sa itavi ni lotu me vakasalataki ira na lewena mera na vakaitavi ena veidigidigi ena yabaki qo.
E levu na veimatalotu sa tauyavutaki e Viti ena gauna oqo ka levu era sega ni dau vakaitavitaki ira ena veivakatorocaketaki ena nodra itikotiko ka oqo e dua na ka e duidui kina na lotu Wesele.
Na lotu Wesele e cakacaka vata kei na vanua ka vaka kina na matanitu e digitaki me veiliutaki.
E levu na veivuke e dau solia yani na matanitu era wase talega kina ko ira na lewe ni lotu era sega ni veitokoni.
Na tiki ni siga ni veidigidigi e sa bera tiko ni kacivaki ia sa tekivu na vunau vakapolitiki e Viti raraba.
ENA QAI TOMANI TALE YANI ENA MACAWA KA TU MAI